Մի՞թե ինչ-որ մարդկանց ավելի շատ ես ատում, քան սիրում ես քո հայրենիքը. չեմ հավատում. Հայկ Մամիջանյան

«Ֆրանսիայի հրապարակում հավաքվածներն ասում են, որ Շուշին ու Հադրութը մերն է, բայց քո քարտեզով մերը չէ, քո քարտեզով Սյունիքում ու Գեղարքունիքում թուրքն է նստած»,- Ֆրանսիայի հրապարակում հանրահավաքի ժամանակ ասաց ՀՀԿ-ական Հայկ Մամիջանյանը՝ խոսքն ուղղելով այն քաղաքացիներին, ովքեր չեն միացել համաժողովրդական պայքարին։

Նա հարցադրում արեց, թե ինչպե՞ս կարող են լավ ապրել մի երկրում, որտեղ առողջապահության նախարարն իրավաբան է, պաշտպանության նախարարը՝ պատմաբան է, ԳՇ-ն պետ չունի, չնայած պատերազմում է։

Մամիջանյանի խոսքով, վերջին 14 տարում Երևանում նման դեպք չի եղել, որ մի օրվա մեջ 400-ից ավելի քո հայրենակից բռնեն ու տանեն թաղմաս, ոչ մի բանի համար, ուղղակի հայրենասեր լինելու համար։

«Ոստիկանների պարգևավճարը ես ու դու ենք տվել։ Այսօր, ըստ իմ տեղեկությունների, ոստիկանության բոլոր աշխատակիցները ստացել են աշխատավարձի 100 տոկոս չափով պարգևավճար։ Այդ ես ու դու ենք տվել, մեր հարկերից։ Հայի օջախ է պահվում, բարով վայելեն, որովհետև խուլիգանություն, վայրենություն անող մի քանի ոստիկան առանց դրա էլ էին անելու, իսկ արժանապատիվ ոստիկաններին ինչքան էլ փող տաս, քո պես վայրենի չեն դառնալու։

Սահմանին կանգած պայմանագրային զինվորն ավելի քիչ է ստանում, քան իր իշխանությունը պահող ոստիկանների մեծ մասը»,- ասաց ընդդիմադիր գործիչը։

Նա դիմեց այն քաղաքացիներին, ովքեր չեն գալիս Ֆրանսիայի հրապարակ, քանի որ չեն ուզում կանգնել այս կամ այն քաղաքական գործչի կողքը. «Ով չի ուզում գա ու մեր կողքը կանգնի, արի ու կանգնի Արթուր Ասոյանի կողքը, ում տղան զոհվել է պատերազմի ժամանակ ու երեկ իրեն բերման էին ենթարկել։ Արի ու կանգնի Ջուլիետա տատիկի կողքը, ում թևն այսօր կոտրեցին, քանի որ տեսավ՝ ջահել տղաներին ծեծում են, չկարողացավ դիմանալ, սկսեց պաշտպանել։ Արի ու կանգնի Արման Օհանջանյանի մայրիկի կողքին, որի կյանքում ամենամեծ հարստությունը մնացել է հոկտեմբերի 20-ին զոհված տղայի ֆրոնտից ուղարկած տեսանյութը։ Այլ հարստություն չունի։

Մի՞թե քեզ նենց են ներշնչել ատելությունն ինչ-որ մարդկանց նկատմամբ, որ դա ավելի շատ է, քան քո հայրենասիրությունը։ Մի՞թե ինչ-որ մարդկանց ավելի շատ ես ատում, քան սիրում ես քո հայրենիքը։
Այդպես չի կարող լինել, դրան չեմ հավատում»։

Նա խնդրեց քաղաքացիներին գան հրապարակ, որպեսզի երբ օտարն իրենց տեսնի ու ասի՝ պատերազմում պարտվել եք, հակադարձի, թե չի պարտվել, իր պետությունը չի պարտվել, «պարտվել է Նիկոլը, ու մենք դրա համար իրեն ռադ ենք արել»։

«Որ գաս, շատ կարևոր բան կլինի՝ հետագայում, այս մղձավանջից հետո, ով էլ երկիրը կառավարի, միշտ կիմանա, որ իշխանությունը ժողովրդինն է»,- ասաց Հայկ Մամիջանյանը։