Լենա Նազարյանին պետք է մեկուսացնել քաղաքականությունից. Գևորգ Պետրոսյան. ArmDaily.am

ՀՀ Ազգային Ժողովի «Քաղաքացիական պայմանագիր» խմբակցության պատգամավոր Լենա Նազարյանն Parliament monitoring-ին տված հարցազրույցի ժամանակ հայտարարել էր, որ այս խորհրդարանական ընդդիմությունը հաջորդ խորհրդարանական ընտրություններին դուրս կմնա խորհրդարանից, կբացի «Զարթնիր, լաո» թերթն ու այնտեղ էլ հավաքներ կանցկացնի:

Նախկին պատգամավոր, իրավաբանական գիտությունների թեկնածու, ԵՊՀ դասախոս Գևորգ Պետրոսյանն ArmDaily.am-ի հետ զրույցում ասաց, որ Լենա Նազարյանը իրավագիտությունից անտեղյակ մարդ է և ոնց կարելի է ի սկզբանե որոշել ժողովրդի ընտրելիքը:

«Եթե նա ասում է, որ այս ընդդիմությունը չի լինելու հաջորդ խորհրդարանում, դա նշանակում է, որ ինքը թքած ունի ընտրական օրենսգրքի վրա, Սահմանադրության վրա: Նա անգրագետ է՝ նա չի պատկերացնում: Ո՞նց կարելի է որոշել ժողովրդի՝ մի քանի տարի հետո անելիքը: Այսինքն, իրենք կանխորոշել են, թե ով պետք է լինի, ով չպետք է լինի՝ սա բռնապետության դասական օրինակ է: Նիկոլ Փաշինի Հայաստանին տված ամենամեծ վնասը այն է, որ ինքը խաժամուժը ներմուծեց պետական պաշտոններ, պետական ապարատ:

Ո՞վ է Լենա Նազարյանը, նա ընդհանրապես ի՞նչ կապ ունի օրենսդիր գործունեության հետ, ես պարզապես ապշած եմ մեր լրագրողների վրա, նրանք Լենա Նազարյաններից հարցազրույց են վերցնում: Լենա Նազարյանն ինչի՞ է տիրապետում, որ նրանից հարցազրույց են վերցնում: Ընդհանրապես պետք է արհամարհել այդ կատեգորիան, նրանց չհամարել այնպիսի մարդ, ումից կարելի է ինչ-որ լուրջ ինֆորմացիա ստանալ: Ո՞վ է նա: Մի հատ իրեն հարցրեք՝ թող մի օրենքի անուն արտաբերի՝ չի կարող: Նա ինչ կապ ունի ընդհանրապես օրենսդիր գործունեության հետ»,-ասաց Պետրոսյանը:

Նախկին պատգամավորը շեշտեց, որ անընդունելի է Նազարյանի արտահայտությունը, թե այս խորհրդարանական ընդդիմությունն Ազգային Ժողովում չի հայտնվելու:

«Դա նշանակում է թքած ունենալ ժողովրդավարության վրա, թքած ունենալ սահմանադրության, ընտրական օրենսգրքի վրա, թքած ունենալ ժողովրդի կարծիքի վրա: Ինքն ընդհանրապես պետք է մեկուսացվի քաղաքականությունից: Նա ընդհանրապես անելիք չունի պետական ապարատում, առավել ևս օրենսդիր մարմնում»,-եզրափակեց Գևորգ Պետրոսյանը: