Այս տարի փղերը Զիմբաբվեի 60 բնակիչների են սպանել

Այս տարի փղերը Զիմբաբվեի 60 բնակիչների են սպանել, քանի որ բնապահպանական գործունեությունը հանգեցրել է մարդկանց հետ հակամարտության, հայտարարել է կառավարության ներկայացուցիչը:

Զիմբաբվեն փղերի թվով աշխարհում երկրորդ տեղն է զբաղեցնում Բոթսվանայից հետո: Երկրում կա 100 000 փիղ, ինչը կազմում է ամբողջ Աֆրիկայի փղերի մոտ մեկ քառորդը:

Ի տարբերություն աշխարհի մեծ մասի, որտեղ որսագողերը սպանում են կենդանիներին նրանց ժանիքների համար, Զիմբաբվեում փղերի պոպուլյացիան տարեկան աճում է մոտ հինգ տոկոսով:

«Որոշ շրջաններում փղերը շարժվում են մեծ հոտերով եւ խժռում են դաշտերում եղած ամեն ինչ, իսկ այժմ նրանք տեղափոխվում են կալվածքներ՝ ստիպելով համայնքի անդամներին պատասխան քայլեր ձեռնարկել»,- ասել է կառավարության ներկայացուցիչ Նիք Մանգվանան:

«Մարդկանց եւ վայրի բնության կոնֆլիկտի հարցը բավականին զգացմունքային է։ Միայն այս տարի 60 զիմբաբվեցիներ են սպանվել փղերի կողմից, 50-ը վիրավորվել են»,- ասել է նա։

2021 թվականին փղերը սպանել են 72 մարդու։

Փղերը թափառում են Զիմբաբվեի հսկայական արգելոցներից դուրս: Սակայն ժողովրդագրական աճը, ինչպես նաեւ աղքատությունը ստիպում են Զիմբաբվեի գյուղական բնակիչներին տեղափոխվել այն շրջաններ, որտեղ նրանք բախվում են փղերի:

Զիմբաբվեի բնակչությունը կազմում է մոտ 15 միլիոն եւ տարեկան աճում է մոտ 1,5 տոկոսով:

Զիմբաբվեի այգիների եւ վայրի բնության վարչությունից Տինաշե Ֆարավոն AFP-ին ասել է, որ իրեն նախազգուշացնում են «աղետի» մասին, եթե փղերի թիվը չկրճատվի:

«Վտանգը, ամենայն հավանականությամբ, կաճի, քանի որ մոտենում է չոր սեզոնը, երբ հոտերը տեղաշարժվում են ջուր եւ սնունդ փնտրելու համար»,- ասել է նա: Ֆարավոն ասել է, որ ռենջերներ են ուղարկվել ամենավտանգավոր փղերին ոչնչացնելու համար։

Բնապահպաններն ասում են, որ Զիմբաբվեն կարող է պահել մոտ 45 000 փիղ, որոնց լայնածավալ արոտավայրեր են անհրաժեշտ: