Երբ խաղը մի դարպասի վրա է, ես չգիտեմ՝ ի՞նչ անաչառության մասին է խոսքը. Տիրան Խաչատրյանը՝ ԱԺ քննիչ հանձնաժողովի մասին
Մենք ի սկզբանե հայտարարել ենք, որ երբ կլինի անկողմնակալ հանձնաժողով, կգնանք և համապատասխան աջակցություն կցուցաբերենք. երբ խաղը մի դարպասի վրա է և մի դարպասապահի դիմաց մի թիմ է խաղում, ես չգիտեմ՝ ի՞նչ անաչառ, անկողմնակալ կարող է լինել: Այս մասին այսօր՝ մայիսի 9-ին, Եռաբլուրում լրագրողների հետ զրույցում ասաց ԳՇ պետի նախկին առաջին տեղակալ Տիրան Խաչատրյանը՝ պատասխանելով 44-օրյա պատերազմի հանգամանքներն ուսումնասիրող ԱԺ քննիչ հանձնաժողով գնալու մասին լրագրողի հարցին:
Գեներալը նման իրավիճակում անիմաստ համարեց հանձնաժողովում ինչ-որ գործընթացի մասնակցելը, բայց որոշակի իրավիճակում չբացառեց, որ հրավերի դեպքում կգնա 44-օրյա պատերազմի հանգամանքների պարզման նպատակով ստաղծված ԱԺ քննիչ հանձնաժողովի նիստին:
«Եթե ես պետք է գնամ, այնտեղ պարզաբանումներ տամ եւ դա որեւէ իմաստ նպատակ չհետապնդի, հետագա ազդեցություն այդ ամբողջի վրա չունենա, իմ գնալու իմաստը ո՞րն է լինելու»,-ասաց Խաչատրյանը և հավելեց, որ եթե իր ներկայացրած փաստերն ինչ-որ չափով օգուտ կտան, ապա կգնա:
Գեներալը նաև տեղեկացրեց, որ տարբեր գործերի հետ կապված իրեն կանչել են քննչական կոմիտեև և կախված իր զբաղեցրած պաշտոնից, գործընթացներին անմիջական մասնակցությունից, տրված բոլոր հարցերին պատասխանել է:
Հարցին, թե ԱԺ-ում իր ներկայացրած փաստերը կօգնեն հասարակությանը պատերազմական իրավիճակի մասին պատկերացում կազմել՝ Տիրան Խաչատրյանը հայտնեց, որ չի օգնի, քանի որ իր տված տեղեկությունները չեն հրապարակվի:
«ԱԺ քննիչ հանձնաժողովում իմ ներկայացրած ոչնչից էլ հասարակությունը չի տեղեկանալու, գաղտնիության ռեժիմը թույլ չի տալու, որ հրապարակվեն ասածներս, նույնիսկ եթե նկարահանվում, ձայնագրվում կամ մեքենագրվում է, միևնույնն է՝ մնալու է այդ պատերի ներսում»,-հայտնեց գեներալը՝ շեշտելով, որ իր ունեցած տեղեկություններն հույժ գաղտնի են:
ԳՇ պետի նախկին տեղակալը հայտնեց, որ ԱԺ քննիչ հանձնաժողովի և իրավապահ մարմինների գործողությունները տարբեր են, որ իրավապահ մարմիններում կան կողմեր, փաստաբաններ և իր տված տեղեկությունները երկու կողմի համար են, իրենք կորոշեն ինչպես օգտագործեն:
Տիրան Խաչատրյանը նաև տեղեկացրեց, որ իրեն իրավապահ մարմիններ հրավիրել են վկայի կարգավիճակում:
Լուրեր Հայաստանից - NEWS.am