Թուրքիայում մտավախություն կա, որ եթե Հայաստանում իշխանությունը փոխվի, հայ-թուրքական գործընթացը կտապալվի. «ՈւԺԻ ԳՈՐԾՈՆ»
«ՈւԺԻ ԳՈՐԾՈՆ» հաղորդման այս թողարկմանը Հայկ Սահակյանը Հայաստանի եւ Թուրքիայի հատուկ ներկայացուցիչների՝ Վիեննայում կայացած 3-րդ հանդիպմանը, դրա եւ Հայաստանում ընթացող բողոքի ակցիաների վերաբերյալ թուրքական մամուլում առկա արձագանքներին, ՀՀ ԱԽ քարտուղարի եւ Ադրբեջանի նախագահի հանդիպմանը, ինչպես նաեւ Հայաստան-Ադրբեջան խաղաղության պայմանագրի վերաբերյալ այս շաբաթ հնչած հայտարարություններին է անդրադարձել։
Թուրքական իշխանամերձ այնպիսի լրատվամիջոցներ, ինչպիսիք են Sabah-ը, Yeni Şafac-ը, Hyurriet-ը, Milliyet-ը, ինչպես նաեւ տարբեր հեռուստաընկերություններ ակտիվ լուսաբանում են Երեւանում ընթացող բողոքի զանգվածային ակցիաները։ Պետական «Anadolu» գործակալությունը հայ-թուրքական հարաբերությունների կարգավորման գործընթացի վերաբերյալ թուրքերենով մի վերլուծություն է հրապարակել, որի հեղինակ, թուրք քաղաքագետ Արմաղան Գյոզկամանը անդրադարձել է տարածաշրջանային իրավիճակին, այն նախադրյալներին, որոնց ազդեցությամբ մեկնարկել են բանակցությունները։
Ուշագրավ է հեղինակի այն միտքը, որ Հայաստանի վարչապետ Նիկոլ Փաշինյանը Հայոց ցեղասպանությունը ճանաչելու հարցը որպես բանակցություններում առաջընթաց ապահովելու պայման չի ներկայացրել Թուրքիային, եւ այդ պատճառով է, որ թուրքական կողմը համաձայնվել է բանակցություններ սկսել հարաբերությունների կարգավորման ուղղությամբ։ Բայց այժմ, ըստ հոդվածագրի, բանակցությունների հետագա ընթացքը կարող է վտանգվել, եթե Հայաստանում բողոքի ալիքի ազդեցությամբ իշխանափոխություն լինի։
Դիտեք նաեւ Հայկ Սահակյանի հարցազրույցն Արցախի ԱԳ նախկին նախարար, արտակարգ եւ լիազոր դեսպան Կարեն Միրզոյանի հետ։
Հաղորդման այլ թողարկումների կարող եք ծանոթանալ այստեղ։