Էկվադորում հանցավորության աճի պատճառով արտակարգ դրություն է հայտարարվել

Էկվադորի նախագահ Գիլերմո Լասսոն արտակարգ դրություն է հայտարարել արեւմտյան երեք նահանգներում հանցավորության աճի պատճառով, հայտնում է BBC-ն։

Լասոն իր թվիթերյան գրառման մեջ նշել է, որ պարետային ժամ է ներդրվելու եւ որ հազարավոր զինվորներ եւ ոստիկաններ կուղարկվեն Գուայաս, Մանաբի եւ Էսմերալդաս՝ «խաղաղության եւ կարգ ու կանոնի ապահովման համար»։

Էկվադորում կտրուկ աճել է սպանությունների եւ խմբակային հանցագործությունների թիվը։

Անցյալ տարի պաշտոնը ստանձնելուց հետո սա երկրորդ դեպքն է, երբ երկրի նախագահն օգտագործում է իր արտակարգ լիազորությունները բռնության դեմ պայքարելու համար:

«Փողոցները կզգան իրենց վրա ուժայինների ծանրությունը»,- գրել է Լասոն։ Նա հայտնել է, որ երեք նահանգներում 4000 ոստիկան եւ էկվադորի ԶՈւ-ի 5000 զինծառայող կտեղակայվեն։

Նա նաեւ հայտնել է, որ պարետային ժամը, որը կգործի միայն որոշ շրջաններում, կգործի տեղական ժամանակով ժամը 23:00-ից մինչեւ 05:00-ն։

Լասոն Էկվադորի հանցավոր խնդիրների մեջ մեղադրել է թմրանյութերի վաճառքով զբաղվող խմբավորումներին: Երկիրն որպես տարանցիկ երթուղի է օգտագործվում Պերուից եւ Կոլումբիայից մաքսանենգ ճանապարհով ներկրվող կոկաինի համար, իսկ մեքսիկական հզոր թմրակարտելները, ինչպես պնդում են իշխանությունները, գործում են տեղական ավազակախմբերի միջոցով: