Բրազիլացի գիտնականները հաշվարկել են Երկրի հետ Ապոֆիսի մերձեցման հետեւանքները 2029թ.

Բրազիլացի գիտնականները վերլուծել են Ապոֆիս աստղակերպի անմիջական մերձակայքի մակերեսային հատկությունները եւ դինամիկան, երբ այն Երկրի կողքով շատ մոտ անցնելիս կլինի 2029թ․, հայտնում է Monthly Notices of the Royal Astronomical Society-ն։

Ապոֆիս աստղակերպը հայտնաբերվել է 2004թ․ եւ այդ ժամանակվանից ուշադիր վերահսկվում է, քանի որ ի սկզբանե այն դասակարգվել է որպես Երկրի համար պոտենցիալ վտանգավոր օբյեկտ։ Մոլորակի հետ դրա բախման հավանականությունը գնահատվել է 2 տոկոս: Ներկայում նման հնարավորությունը գործնականում բացառված է, եւ, ըստ վերջին տվյալների, Ապոֆիսը Երկրին կմոտենա 38 000 կմ-ից ոչ ավելի, եւ դա տեղի կունենա 2029թ․ ապրիլի 13-ին։

Նոր հետազոտությունը վերլուծում է այս երկնային մարմնի ֆիզիկական բնութագրերը եւ Երկրին մոտենալու հնարավոր հետեւանքները։ Հոդվածի հեղինակներից մեկը՝ Մադրիդի Կառլոս III-ի անվան համալսարանից Գաբրիել Բորդերես-Մոտտան, բացատրում է, որ երկու օբյեկտների ուղղակի բախումը միակ սպառնալիքը չէ նման դեպքերում։ Մոլորակի եւ Ապոֆիսի նման մեծ երկնային մարմնի գրավիտացիոն փոխազդեցությունը կարող է փոխել վերջինիս ձեւը, մասերի բաժանել այն, մակերեսից պոկել ժայռերը եւ նույնիսկ շպրտել աստղակերպի շուրջը պտտվող այլ մարմինները: Թիմը բազմաթիվ մոդելավորումների միջոցով փորձել է կանխատեսել, թե ինչպես կվարվեն այդ մարմինները՝ ի պատասխան արտաքին գրգռիչների:

Այս մոդելավորումից եզրակացություն է արվել, որ եթե Ապոֆիսը բավականաչափ ցածր խտություն ունի, ապա վատ ամրացված քարերի մոտավորապես 90 տոկոսը կարող է լքել դրա մակերեսը Երկրին մոտենալու ժամանակ եւ անկանխատեսելի կերպով ցրվել շրջակա տարածության մեջ: Բացի այդ, մոդելավորման արդյունքները ցույց են տվել, որ Ապոֆիսի մոտենալը կարող է աննշան ուժգնության մակընթացություն առաջացնել Երկրի վրա, իսկ մյուս կողմից՝ սողանքներ առաջացնել աստղակերպի մակերեւույթին։