ԱԺ–ում կրքերը թեժացան, Ռուբինյանը տեղից վեր կացավ. նիստն ընդհատվեց

Արդեն երկրորդ անգամ ԱԺ դահլիճում ազդեցության գործակալ լինելու մասին թեզեր են առաջ տարվում: Այս մասին, այսօր՝ հունվարի 17-ին, ԱԺ-ում հայտարարեց ԱԺ փոխխոսնակ Հակոբ Արշակյանը՝ անդրադառնալով նրան, որ ընդդիմադիր պատգամավորները ԱԺ փոխխոսնակ Ռուբեն Ռուբինյանին մեղադրեցին Թուրքիայի ազդեցության գործակալ լինելու մեջ:

Արշակյանն ասաց. «Ես ուզում եմ ընդամենը մեր ընդդիմադիր գործընկերներին զգուշացնել, որ մարդուն փորձել պիտակավորել հեղափոխության կամ որեւէ այլ ժամանակաշրջանում որեւէ երկրում գտնվելը բերեկլ կապել ազդեցության գործակալ լինելու հետ, դա նույնն է, որ որեւէ մեկին ազգանունից ելնելով նրան կապել գործակալ լինել-չլինելու հետ: Խնդրում եմ՝ ձեր շուրջը նայել եւ ազգանունների մեջ կարող է կասկածելի ազգանուններ հայտնաբերեք: Բայց նաեւ խորհուրդ չեմ տա, որովհետեւ դա սխալ գործելաոճ է»:

ԱԺ նիստը վարող Ա փոխխոսնակ Ռուբեն Ռուբինյանը ընդհատեց եւ ասաց. «Հայտարարում եմ նկատողություն, ի՞նչ էր ձեր անունը, Հռիփսիմե Ստաբուլյանին: Ինձ թվում է՝ դուք լավ չեք հասկանում, ձեզ սխալ է թվում: Ես ամբողջ ձեր խմբակցությանն արդեն ես կոչ եմ անում հանգստացեք: Կանեմ էն, ինչ կուզեմ»:

Տեղից մեկն ասաց. «Չես կարա», ինչին Ռուբինյանը բղավելով արձագանքեց. «Տիրություն արեք, կարամ»:

Նա տեղից թափով վեր կացավ, իջավ ներքեւ, իրավիճակը լարվեց: Քիչ անց նա վերադարձավ իր տեղը եւ կոչ արեց բոլորին. «Նստեք տեղներդ: Պարոն Արշակյան, շարունակեք»:

Քանի որ կրքերը չէին հանդարտվում, Ռուբինյանը ընդմիջում հայտարարեց՝ նշելով, որ նիստը կվերսկսեն մեծ ընդմիջումից հետո:

***

Ես բավականին համբերատար մարդ եմ, գուցե նաև բարեհամբույր, բայց ես ճի՞շտ լսեցի, որ այս դահլիճում ինչ-որ մեկը ինձ մեղադրեց Թուրքիայի ազդեցության գործակալ լինելու մեջ։ Այս մասին ԱԺ հերթական նիստին հայտարարեց ԱԺ փոխնախագահ Ռուբեն Ռուբինյանը։

«Ուրեմն՝ լսեք ինձ, տիկին Խամոյան և ձեր ամբողջ խմբակցությունը, այստեղ որևէ մեկը կա՞, որ կարող է կանգնել ու իմ դիմաց ասել, որ ես ազդեցության գործակալ եմ։ Այդպիսի մարդ չկա ու չի կարա լինել։ Նախ՝ դա լիապես անհիմն պնդում է, երկրորդ՝ ի պատասխան դրա՝ ես կարող եմ մոռանալ իմ ամբողջ համբերատարությունը, բարեհամբույրությունը, և ասել կամ անել բաներ ձեզ հետ։ Կփորձեմ, արխային, ու սրանից հետո իմ հետ «դու»-ով չխոսաս, պարզ ա՞: Հանգստացեք բոլորդ ու իմացեք՝ ինչ եք խոսում ու ում մասին: Պարոն Օհանյան, պարոն Մինասյանը, կարգի բերեք ձեր խմբակցության անդամներին: Սա ասում են առաջին ու վերջին անգամ»,-ասաց Ռուբինյանը։