Կրտսեր եղբայրը ծեծելով սպանել է ավագ եղբորը, ապա զանգել 1-02. Ոստիկանության բացահայտումը (տեսանյութ)
ՀՀ ոստիկանության տարածած հաղորդագրության համաձայն՝ դեպքը, որը հունվարի 12-ին տեղի է ունեցել Կոշ գյուղում, կարելի է համեմատել դետեկտիվ ֆիլմի հետ: Այդ օրը՝ ժամը 15:00-ին, ոստիկանության Աշտարակի բաժնի ծառայողները տանը մահացած են գտել 40-ամյա տղամարդու: Դին հյուրասենյակում հայտնաբերած է եղել նրա եղբայրը և զանգել 1-02:
Դիակի զննությամբ դեմքին արնանման հետքեր են հայտնաբերվել: Ըստ ոստիականության նախնական եզրակացության՝ կա՛մ նրան սպանած են եղել, կա՛մ մահը վրա է հասած եղել ծեծելուց որոշ ժամանակ անց: Դեպքի առթիվ հարուցվել է քրեական գործ: Նշանակվել է դատաբժշկական փորձաքննություն:
Բացահայտման աշխատանքներին միացել են ոստիկանության Արագածոտնի մարզային վարչության և մարզի քննչական վարչության ծառայողները։ Առաջ են քաշվել տարբեր վարկածներ: Իրավապահները զրուցել են հարևանների, հետո՝ դարձյալ հանգուցյալի եղբոր հետ, որը նրանից երկու տարով է փոքր ու նույն հասցեում են բնակվել: Ոստիկաններին հետաքրքրել է, թե նա ե՞րբ է տեսած եղել եղբորը հյուրասենյակում ընկած, տա՞նն է եղել, թե՞ դրսից է եկել: Առաջացած հարցերը ոչ այնքան պատասխաններ, որքան նոր հարցեր են առաջ բերել:
Համալիր ու բազմակողմանի միջոցառումների արդյունքում, ինչպես նաև նախաքննությամբ ձեռք բերված բավարար ապացույցների համակցությամբ հիմնավորվել է, որ հանցագործությունը կատարել է տուժողի 38-ամյա եղբայրը՝ նախկինում դատապարտված:
Ըստ ոտիկանության՝ եղբայրները վիճել են, ապա կրտսեր եղբայրը ծեծել է ավագ եղբորը, մարմնական վնասվածք հասցրել, ինչն էլ նրա մահվան պատճառն է դարձել։
38-ամյա տղամարդը բերման է ենթարկվել ոստիկանության Աշտարակի բաժին։ Նա ձերբակալվել է։ Հանգամանքները նախաքննությամբ պարզվում են։