ՀԱՊԿ-ը խաղաղապահ ուժեր կուղարկի Ղազախստան՝ երկրում իրավիճակի կայունացման եւ կարգավորման նպատակով. Փաշինյան
Քիչ առաջ հեռախոսազրույց ունեցա Ղազախստանի նախագահ Կասիմ-Ժոմարդ Տոկաևի հետ: Այս մասին երեկ երեկոյան իր Facebook-ի էջում գրել է ՀՀ վարչապետ Նիկոլ Փաշինյանը:
«Հաշվի առնելով Ղազախստանի նախագահի դիմումը, ով ակնկալում է ՀԱՊԿ աջակցությունը Ղազախստանում հաստատված իրավիճակը հաղթահարելու հարցում, որպես ՀԱՊԿ Հավաքական անվտանգության խորհրդի նախագահ անհապաղ խորհրդակցություններ եմ սկսում ՀԱՊԿ երկրների ղեկավարների հետ»,-նշել է նա:
Ավելի վաղ հայտնել էինք, որ Ղազախստանի նախագահ Կասիմ Ժոմարտ Տոկաևը հայտարարել է, որ դիմել է ՀԱՊԿ անդամ երկրների ղեկավարներին՝ ահաբեկչական սպառնալիքի հաղթահարման հարցում օգնության համար։
Տոկաևն ասել է, որ այն, ինչ կատարվում է երկրում, դիտարկում է որպես արտաքին ագրեսիայի ակտ։ Նա նշել է, որ խոսքը պետության ամբողջականությանը սպառնացող վտանգի և քաղաքացիների վրա հարձակումների մասին է։
Նրա խոսքով, Ալմաթիի մերձակայքում այժմ ընթանում է ահաբեկչական խմբավորումների համառ պայքար՝ ՊՆ օդադեսանտային ստորաբաժանումների հետ։
Հիշեցնենք, որ Ղազախստանի տարբեր քաղաքներում բողոքի ակցիաներ են հեղուկ գազի գնի կրկնակի թանկացման դեմ։ Ակցիաների ժամանակ գրանցվում են անկարգություններ, բախումներ ոստիկանների ու ակցիայի մասնակիցների միջև։
Ղազախստանի տարբեր շրջաններում տեղի ունեցած անկարգությունների հետևանքով սպանվել է ութ ոստիկան և Ազգային գվարդիայի զինծառայող, տուժել է անվտանգության ավելի քան 300 աշխատակից։
***
ՀԱՊԿ-ը հավաքական խաղաղապահ ուժեր կուղարկի Ղազախստանի Հանրապետություն՝ երկրում իրավիճակի կայունացման եւ կարգավորման նպատակով: Այս մասին ֆեյսբուքյն իր էջում գրել է ՀՀ վարչապետ, ՀԱՊԿ Հավաքական անվտանգության խորհրդի նախագահ Նիկոլ Փաշինյանը։
Նա, մասնավորապես, գրել է․
«Ղազախստանի հանրապետության նախագահ Կասիմ-Ժոմարդ Տոկաեւի դիմումի հիման վրա եւ Ղազախստանի ազգային անվտանգությանը եւ ինքնիշխանությանը սպառնացող վտանգների բերումով, որն առաջացել է այդ թվում արտաքին միջամտության արդյունքում, ՀԱՊԿ Հավաքական անվտանգության խորհուրդը Հավաքական անվտանգության պայմանագրի 4-րդ հոդվածի համաձայն որոշում է կայացրել սահմանափակ ժամանակահատվածով Ղազախստանի հանրապետություն ուղարկել ՀԱՊԿ հավաքական խաղաղապահ ուժեր՝ այդ երկրում իրավիճակի կայունացման եւ կարգավորման նպատակով»։
«Հաշվի առնելով Ղազախստանի նախագահի դիմումը, ով ակնկալում է ՀԱՊԿ աջակցությունը Ղազախստանում հաստատված իրավիճակը հաղթահարելու հարցում, որպես ՀԱՊԿ Հավաքական անվտանգության խորհրդի նախագահ անհապաղ խորհրդակցություններ եմ սկսում ՀԱՊԿ երկրների ղեկավարների հետ»,- ֆեյսբուքյան իր էջում գրել էր Նիկոլ Փաշինյանը։