Կովկասանի «Խելացի գյուղի» շինարարները դժգոհ են վճարման եւ կենցաղային պայմաններից

Զանգիլանում (Կովկասան հայկական անվանումը-խմբ.)«խելացի գյուղ» կառուցելու համար վարձված մինչեւ 300 շինարարներ դիմել են լրագրողներին՝ բողոքելով աշխատանքային պայմանագրերից, աշխատավարձից եւ նորմալ կենսապայմանների բացակայությունից։ Երկու ամիս է՝ աշխատավարձ չեն ստացել։ Նրանց խոստանում են աշխատավարձերը փոխանցել քարտերին, սակայն չունեն բանկային քարտեր՝ աշխատանքային պայմանագրերի բացակայության պատճառով։

Դեկտեմբերի 1-ին աշխատակիցները դիմում են ներկայացրել ընկերության ղեկավարությանը։ Խոստացել են զբաղվել բողոքներով։ Ոստիկանության 102 հեռախոսահամարով զանգահարել է 8 մարդ, որից հետո նրանցից գրավոր դիմում-բողոքներ են վերցվել։

Աշխատակիցներից մեկն ասում է, որ թվարկված հանգամանքների պատճառով շինարարներից մի քանիսը լքել են աշխատավայրը, եւ այդ պատճառով շինարարությունը դադարեցվել է։

Բանվորները չեն նշում շինարարական ընկերության անունը, որը նրանց ներգրավել է Զանգիլանում (Կովկասան) աշխատանքներին։ «Մեզ բերել ու շպրտել են այստեղ։ Ապրում ենք ցրտի մեջ, առանց տարրական պայմանների։ Այս երկրում նախագահ կա, հույս ունենք, որ նա կզբաղվի մեր խնդրով»,-ասել է բանվորներից մեկը։

Հավելենք, որ Զանգիլանի «Խելացի գյուղի» շինարարական աշխատանքները ցուցադրվում են պետական ​​հեռուստաալիքներով։ Հոկտեմբերի 20-ին հաղորդվել է, որ գյուղի շինարարությունն ավարտվում է։ Բնապահպանության եւ բնական պաշարների նախարարությունը հեռուստատեսությամբ հայտնել է, որ գրեթե ավարտված են 200 բնակելի եւ չորս սոցիալական շենքեր, մինչեւ տարեվերջ շահագործման կհանձնվեն նաեւ բնապահպանական օբյեկտները, այդ թվում՝ արհեստական ​​լիճը։

Գյուղատնտեսության նախարարությունից Turan-ին հայտնել են, որ ենթակապալառու կազմակերպությունն է մեղավոր, որ բանվորներ է վարձել եւ չի կարգավորել վճարման եղանակը։ Ընկերությունն առաջարկել է վճարել բանկի միջոցով, սակայն բանվորները կանխիկ գումար են պահանջում, քանի որ դժվարանում են վճարել բանկոմատների միջոցով։

ԶԼՄ-ների տեղեկություններով՝ «խելացի գյուղի» շինարարության գլխավոր կապալառու է նշանակվել «AS Group Investment»-ը։

Իրավապաշտպան Միրվարի Գահրամանլին՝ մեկնաբանելով շինարարների դժգոհությունը, աշխատողներին առաջարկել է դիմել Աշխատանքի եւ բնակչության սոցիալական պաշտպանության նախարարությանը կից աշխատանքի տեսչություն։ «Եթե օգուտ չլինի, թող դիմեն դատարան»,-ասել է նա։

Ագալի-2 գյուղում խելացի գյուղի նախագծի իրականացման համար 2021 թվականի 6 ամիսների ընթացքում գյուղատնտեսության նախարարությանը հատկացվել է 10,8 մլն մանաթ։

Ադրբեջանի ֆինանսների նախարարության տվյալներով՝ 2021 թվականի հունվար-հունիսին Ադրբեջանի կառավարությունը գրավյալ տարածքների, այդ թվում՝ Զանգիլանի շրջանի վերականգնման ծրագրի շրջանակում ծախսել է 372,1 մլն մանաթ։

«Խելացի գյուղ» առաջին նախագիծը երկրի ղեկավարի կողմից գործարկվել է 2021 թվականի ապրիլին։ Հոկտեմբերի վերջին տասնօրյակում Ադրբեջանի նախագահ Իլհամ Ալիեւը մեկնել է Զանգիլանի շրջան եւ ծանոթացել աշխատանքներին։ Գյուղատնտեսության նախարար Ինամ Քերիմովն ասել է, որ ծրագրի շրջանակում ավելի քան 110 հա տարածքում շինարարական աշխատանքներ են ընթանում, եւ մանրամասն խոսել է այն մասին, թե մոտ ապագայում այստեղ ինչպիսի «խելացի այգի-քաղաք» կլինի։

Ադրբեջանցի մի քանի ճարտարապետներ լրագրողների հետ հարցազրույցներում Զանգիլանի «խելացի գյուղը» համեմատել են ցարական Ռուսաստանի «Պոտյոմկին գյուղերի» (այսինքն՝ երկրի ղեկավարին խաբելու համար կեղծ գյուղեր) հետ։