Պուտինը ՌԴ քաղաքացիություն ստանալը պարզեցնող դաշնային օրենքի նախագիծ է ներկայացրել Պետդումա

ՌԴ նախագահ Վլադիմիր Պուտինը «Ռուսաստանի Դաշնության քաղաքացիության մասին» դաշնային օրենքի նախագիծ է ներկայացրել Պետդումա, հայտնում է ՌԲԿ-ն։

Փաստաթղթով առաջարկվում է ընդլայնել նախագահի լիազորությունները՝ Ռուսաստանի քաղաքացիության պարզեցված ստացման իրավունք ունեցող անձանց կատեգորիաները որոշելու համար։

Օրինագիծը նախատեսում է նաեւ քաղաքացիություն ստանալու պահանջների քանակի կրճատում ավելի քան 20 կատեգորիայի անձանց համար։ Խոսքը`

նախկին ԽՍՀՄ քաղաքացիների եւ նրանց երեխաների,

արտերկրում բնակվող հայրենակիցների` Ռուսաստան կամավոր վերաբնակեցմանը նպաստող պետական ​​ծրագրի մասնակիցների,

մարդկանց, ում մերձավոր ազգականներն ապրում են Ռուսաստանում եւ դրա քաղաքացիներ են,

մարդկանց, ում ուղիղ աճող գծով հարազատները մշտապես բնակվել են Ռուսական կայսրության կամ ԽՍՀՄ տարածքում (ժամանակակից Ռուսաստանի պետական ​​սահմանի սահմաններում), եւ Ռուսաստանի քաղաքացիություն ստանալու համար դիմողների այլ կատեգորիաների մասին է:

Առաջարկվում է նախագահի բացառիկ իրավասության տակ թողնել միայն քաղաքացիության շնորհումը։ Այն կտարածվի՝

Մեծ հայրենական պատերազմի վետերանների` նախկին ԽՍՀՄ քաղաքացիների,

Ռուսաստանին հատուկ ծառայություններ մատուցած անձանց,

Անձանց, ովքեր հետաքրքրություն են ներկայացնում երկրի համար իրենց մասնագիտության կամ որակավորման պատճառով:

«Ինչ վերաբերում է մնացած կատեգորիաների անձանց, Ռուսաստանի Դաշնության քաղաքացիության հարցերով որոշումներ կայացնելու իրավունքը վերապահված է Ռուսաստանի ներքին գործերի նախարարությանը եւ Ռուսաստանի արտաքին գործերի նախարարությանը», - ասվում է փաստաթղթի նախագծում:

Ֆիկտիվ ամուսնությունները բացառելու համար ՌԴ քաղաքացիության պարզեցված ստացումը հնարավոր կլինի միայն այն դեպքում, եթե ամուսնության մեջ լինի ընդհանուր երեխա, ասվում է օրենքի նախագծում, փոխանցում է ՏԱՍՍ-ը։

Ներդրողները եւ որակավորված մասնագետները ներառված չեն Ռուսաստանի քաղաքացիության պարզեցված ստացման իրավունք ունեցող անձանց կատեգորիայում: Պետության դեմ մի շարք ծանր հանցագործությունները կհանգեցնեն Ռուսաստանի քաղաքացիության դադարեցմանը, ասվում է օրինագծում։

Ռուսաստանի Դաշնության քաղաքացիության ընդունման մասին որոշման չեղարկման փոխարեն ներդրվում է Ռուսաստանի Դաշնության քաղաքացիության դադարեցման ինստիտուտը։