Նախարար․ Հայաստանում գիտնականների աշխատավարձերը կարող են եռապատկվել

Գիտնականների աշխատավարձերը կարող են եռապատկվել։ Այս մասին դեկտեմբերի 28-ին լրագրողների հետ զրույցում ասաց Հայաստանի կրթության, գիտության, մշակույթի եւ սպորտի նախարար Վահրամ Դումանյանը՝ ներկայացնելով տարվա արդյունքները։

Գիտության ֆինանսավորումը, նրա խոսքով, աճել է 85%-ով։

Նա հավելեց, որ «Երիտասարդ ընտանիքին` մատչելի բնակարան» ծրագրի ֆինանսավորման ծավալը 2021 թվականին գերազանցել է 1,3 մլրդ դրամը։ Այդ միջոցները տրամադրվել են տոկոսների սուբսիդիաների տեսքով, որոնք վերաբերում են 5861 բնակարանների։

Նախարարը նաեւ հայտնեց, որ անցնող տարում 20 բնակավայրերում կառուցվել են մոդուլային մանկապարտեզներ, 10 բնակավայրերում ներդրվել են այլընտրանքային նախադպրոցական ծառայություններ (յուրաքանչյուր բնակավայրի համար 7,8 մլն դրամ գրանտի տեսքով):

«Շինարարության, վերակառուցման եւ վերանորոգման ծրագրում ընդգրկվել է 88 դպրոց, 30-ից ավելի դպրոցներում աշխատանքներ են իրականացվել կահավորման եւ գույքի գնման ուղղությամբ, 107 դպրոցներում ներդրվել է 330 լաբորատորիա։ Տավուշում ներդրման փուլում է 80 լաբորատորիա։ Երկրում վերապատրաստվել է 7000 ուսուցիչ։

Միջին մասնագիտական ​​կրթության ոլորտում վերջին երեք տարիների ընթացքում ներդրվել է 21 նոր մասնագիտություն։ 2022 թվականին նախատեսվում է ներմուծել եւս երկու մասնագիտություն։

Սպորտի ոլորտում Հայաստանը աշխարհի եւ Եվրոպայի առաջնություններում նվաճել է 199 մեդալ (55 ոսկե, 57 արծաթե եւ 87 բրոնզե մեդալ),-ասաց Դումանյանը։

Մշակույթի ոլորտի ֆինանսավորման չափը 2022 թվականին կկազմի 1,59 մլրդ դրամ (ավելի քան 3 մլն դոլար – խմբ.)։

Կրթության, գիտության, մշակույթի եւ սպորտի փոխնախարար Արա Խզմալյանն ասաց, որ 2022 թվականին Ռուսաստանում Հայաստանի մշակույթի օրերը լինելու են ամենախոշոր իրադարձությունը։

«Սա նոր ձեւաչափ է լինելու։ Մենք նպատակ ունենք հետաքրքրություն առաջացնել ոչ միայն հայկական սփյուռքի, այլ նաեւ ռուսական լսարանի մոտ»,-նշեց փոխնախարարը։