Բանակում պետք է կադրային լուրջ փոփոխություններ իրականացվեն. ինչը կար, մեզ բերեց արհավիրքի. Արմեն Խաչատրյան
Ես կադրային ջարդ տերմինը ՊՆ-ի մասով չէի ընդունի, բայց այո, Պաշտպանության նախարարությունում պետք է իրականացվի լուրջ ու ծավալուն կադրային փոփոխություն: Այս մասին, այսօր՝ դեկտեմբերի 28-ին, ԱԺ-ում լրագրողների հետ զրույցում նշեց ԱԺ «Քաղաքացիական պայմանագիր» խմբակցության պատգամավոր Արմեն Խաչատրյանը:
«Մենք անցել ենք պատերազմի միջով, պրակտիկ տեսել ենք՝ որտեղ կան խնդիրներ: Բանակում պետք է կադրային լուրջ փոփոխություններ իրականացվեն, բանակում պետք է լինեն այնպիսի կադրեր, որոնք այսօրվան են համահունչ ու կարող են այսօրվա պայմաններում նոր բանակի ձևավորման մեջ լուրջ դերակատարում ունենալ», - ասաց նա:
Պատգամավորն ընդգծեց` հիմա Հայաստանն ունի նոր մարտահրավերներ ու այդ մարտահրավերների պայմաններում պետք է ունենալ նոր կադրեր, նոր մտածելակերպ. «Նոր գիտելիքներով զինված կադրային ինստիտուտ պետք է ձեւավորենք շատ արագ, որ կարողանանք առաջ գնալ: Հին մեթոդներով մենք երկարատև ժամանակ արդյունքների չենք հասնի, հետևաբար, կադրային փոփոխությունը շատ պահանջված է:
Գեներալ կլինի, ավագ լեյտենանտ կլինի, որևէ նշանակություն չունի, պետք ծառայության մեջ լինեն այն մարդիկ, որոնք ունեն այդ բարեփոխումների տեսլականը: Մենք չենք կարող բավարարվել նրանով, ինչը կա: Ինչը որ կար, մեզ բերեց արհավիրքի ու պատերազմում տեսանք բավականին լուրջ խնդիրներ` սկսած զորահավաքային խնդիրներից, վերջացրած մարտերի կառավարման խնդիրներով», - ասաց Արմեն Խաչատրյանը:
Նա հավելեց, որ բանակում կան երիտասարդ լավ կադրեր, որոնք երկար ծառայել են բանակում, բայց գլխավոր պաշտոնների չեն եղել. «Գուցե այդ սերնդից էլ պետք է աճեցնել ու առաջ բերել մարդկանց»: