Նիկոլ Փաշինյանն այսօր մասնակցել է Երևանի ավագանու նիստին, որի շրջանակում տեղի է ունեցել Երևանի նորընտիր քաղաքապետ Հրաչյա Սարգսյանի երդմնակալության արարողությունը

Վարչապետ Նիկոլ Փաշինյանն այսօր մասնակցել է Երևանի ավագանու նիստին, որի շրջանակում տեղի է ունեցել Երևանի նորընտիր քաղաքապետ Հրաչյա Սարգսյանի երդմնակալության արարողությունը։

Նիկոլ Փաշինյանը հանդես է եկել ելույթով, որում, մասնավորապես, նշել է.
«Հարգելի պարոն քաղաքապետ,
Երևանի ավագանու հարգելի անդամներ,
Ազգային ժողովի մեծարգո նախագահ,
Կառավարության և գործադիր իշխանության հարգելի ներկայացուցիչներ,
Սիրելի ներկաներ,
Նախ ուզում եմ շնորհավորել Հրաչյա Սարգսյանին՝ Երևանի քաղաքապետի բարձր պաշտոնում ընտրվելու համար: Ես ինքս ժամանակին եղել եմ Երևանի քաղաքապետի թեկնածու և ամբողջությամբ եմ պատկերացնում, թե ինչպիսի բարձր պատիվ է լինել մայրաքաղաք համայնքի ղեկավար:
Ուզում եմ հաջողություններ մաղթել քաղաքապետին և Երևանի ավագանուն՝ այս կարևորագույն շրջանում նախանշված ծրագրերն իրագործելու համար: Ուզում եմ շնորհավորել նաև Երևանի ավագանուն, որովհետև իմ համոզմունքն այն է, որ մեր օրակարգի կարևորագույն խնդիրներից մեկը պետական ինստիտուտների կայացումն է: Եվ վերջին օրերին տեղի ունեցած իրադարձություններով Երևանի ավագանին հստակ քաղաքական կամք ցուցադրեց Հայաստանի Հանրապետությունում տեղական ինքնակառավարման նոր մոդելի կայացման ճանապարհին:

Ի վերջո, եկեք արձանագրենք, որ այսօր արդեն Հայաստանի Հանրապետության 4000 և ավելի բնակչություն ունեցող բոլոր համայնքներում տեղի են ունենում համամասնական ընտրություններ, ինչը ենթադրում է համայնքի կառավարման նոր մոդել, որը համապատասխան է նաև, ըստ էության, երկրի կառավարման մոդելին: Եվ մենք պետք է արձանագրենք, որ այս նոր մոդելը, այո, իր արդյունավետությունը ցուցադրել է նաև Երևանի, Գյումրիի, Վանաձորի կառավարման առումով:

Ուզում եմ արձանագրել, որ այն ծրագիրը, որը 2018 թվականից իրագործվում է Երևան քաղաքում, «Իմ քայլը» դաշինքի նախընտրական ծրագիրն է, որը պետք է ընդգծեմ՝ մեծամասամբ բխում է «Ելք» դաշինքի Երևանի ավագանու ընտրությունների 2017 թվականի ծրագրից: Եվ զարգացման այն ուղղությունները, որ այսօր իրականացվում են Երևան քաղաքում, ահա, իրականացվել են քաղաքական որոշումների արդյունքում, որովհետև դեռ 2018 թվականին, երբ Երևանի ավագանու ընտրություններ էին տեղի ունենում հեղափոխությունից անմիջապես հետո, մեր կարևորագույն տեսլականը և արձանագրումը եղել է այն, որ ընտրություններից հետո պետք է իրականացվեն այն նախընտրական ծրագիրը և այն նախընտրական ծրագրի հիմնադրույթները, որոնք դեռևս 2017 թվականին «Ելք» դաշինքը դրել է Երևանի ընտրողների առաջ և ավելի քան 20 տոկոս ձայն է ստացել:
Ցանկանում եմ արձանագրել, որ Կառավարությունն այս ընթացքում էական և շոշափելի աջակցություն է ցույց տվել Երևանի քաղաքապետարանին: 2018 թվականից ի վեր Կառավարությունը, ֆինանսական տարբեր գործիքներով, շուրջ 50 մլրդ դրամի հատկացումներ է արել Երևանի քաղաքապետարանին: Շուրջ 50 մլրդ դրամի: Եվ, ընդ որում, ուզում եմ շատ կարևոր արձանագրում անել՝ ոչ այն պատճառով, որ Երևանի ավագանիում մեր քաղաքական թիմն ունեցել է մեծամասնություն, եթե «Ելք» դաշինքն էլ հաշվենք, ավելի լայն մեծամասնություն, այլ որովհետև մենք կարևոր ենք համարել ինստիտուցիոնալ կայացումը:

Մի փոքր շեղվելով թեմայից՝ ցանկանում եմ ձեր ուշադրությունը հրավիրել կարևոր մեկ փաստի վրա: Կարծում եմ՝ պետք է ուշադրություն դարձնենք այն իրողության վրա, որ վերջերս կայացած տեղական ինքնակառավարման մարմինների ընտրություններում այնտեղ, որտեղ գործող քաղաքապետերը մասնակցել են ընտրություններին, մեծ մասում գործող քաղաքապետերը հաղթել են: Եվ սա ամենևին պատահական չէ, հարգելի գործընկերներ: Դեռևս մի քանի տարի քաղաքական վերլուծաբանները և տեսաբանները ասում էին, որ Կառավարությունը կամ քաղաքական մեծամասնությունը գործում է ինքն իր դեմ: Ի՞նչ նկատի ունեին:

Մենք, ըստ էության, 2018 թվականից ի վեր, եթե Երևանն էլ ներառենք, շուրջ 350 մլն դոլարի ներարկումներ ենք արել տեղական ինքնակառավարման մարմիններ և ստեղծել ենք համակարգ, որը պարտադրաբար համայնքների ղեկավարներին դնում է ընտրողին հանդիման, քաղաքացուն հանդիման, ժողովրդին հանդիման: Եվ դա արել ենք երկու գործիքով: Այսօր Հայաստանի Հանրապետության յուրաքանչյուր քաղաքացի գիտի՝ առաջինը, որ որևէ մակարդակի ընտրությունների արդյունքները Հայաստանի Հանրապետությունում չեն կեղծվում, երկրորդը՝ մենք սուբվենցիոն համակարգերի ներդրմամբ հստակ ուղերձ ենք հղել տեղական ինքնակառավարման մարմիններին, որ չի լինելու ՏԻՄ, այսինքն՝ համայնքների զարգացմանը, իրոք, նպաստող որևէ ծրագիր, որ Կառավարության կողմից կմերժվի: Այդ սկզբունքը պահել ենք, պահում ենք և պահելու ենք, երրորդը՝ համայնքների ավագանու նոր ընտրակարգ հանրապետության ամբողջ տարածքում ներդնելով՝ մենք համայնքների գործող ղեկավարներին ինստիտուցիոնալ ավելի մոտիկ ենք դարձրել ժողովրդին, որովեհտև ավագանու անդամների գործունեությունը, ըստ էության, հանրային, հասարակական գործունեության տեսակ է, որի նշանակությունը քաղաքացու և քաղաքապետի կապն ապահովելն է: Եվ այդ կապի՝ ավագանու, ժողովրդի և համայնքի ղեկավարի կապի խզումն ուղղակի ինստիտուցիոնալ առումով անհամատեղելի է:

Այս ինստիտուցիոնալ կայացումը ես շատ կարևոր եմ համարում, և մենք, այո, պետք է շարունակենք պետական ինստիտուտների կայացման այս քաղաքականությունը, որովհետև հենց ինստիտուտների կայացումն է, որ պիտի երաշխավորի Հայաստանի Հանրապետության տեղական ինքնակառավարման մարմինների հետագա և բնականոն զարգացումը: Մենք շարունակելու ենք աջակցել համայնքներին, մենք շարունակելու ենք աջակցել Երևանին, Երևանի քաղաքապետարանին, քաղաքապետին, ավագանուն՝ իրականացնելու այն ծրագրերը, որ միասին ձևակերպել ենք 2017, 2018 թվականներին:

Հարգելի պարոն քաղաքապետ,
Եվս մեկ անգամ շնորհավորում եմ Ձեզ: Ավագանու հարգելի անդամներ, ևս մեկ անգամ շնորհավորում եմ ձեզ: Ուզում եմ նաև շնորհակալություն հայտնել քաղաքական սկզբունքայնության համար, որը շատ էական է արդի շրջանում տեղական ինքնակառավարման մարմինների և պետական ինստիտուտների կայացման ճանապարհին:

Շնորհակալ եմ»: