Welt. Գերմանիայի նոր իշխող կոալիցիան մտադիր է պարզեցնել քաղաքացիություն ստանալու ընթացակարգը

Գերմանիայի նոր իշխող կոալիցիան, որը կազմված է սոցիալ-դեմոկրատներից, «կանաչներից» եւ լիբերալներից, նախատեսում է պարզեցնել Գերմանիայի քաղաքացիություն ստանալու ընթացակարգը, մասնավորապես՝ թույլ տալ երկքաղաքացիության հնարավորությունը։ Այս մասին հայտնում է ՏԱՍՍ-ը՝ վկայակոչելով Die Welt թերթը:

Հրատարակությունը պարզաբանում է, որ Գերմանիան երկար ժամանակ եղել է միգրանտների ամենասիրված ուղղությունը Եվրոպայում։ Գերմանական ապագա կառավարությունը նախատեսում է փոփոխել քաղաքացիության մասին գործող օրենքն ու երկիրն ավելի հայտնի դարձնել օտարերկրացիների շրջանում։ «Մենք քաղաքացիություն ստանալու ժամանակակից իրավական համակարգ են ստեղծում։ Այդ նպատակով մենք հնարավորություն կտանք բազմակի [երկակի] քաղաքացիությունը եւ կպարզեցնենք Գերմանիայի քաղաքացիության ստացումը»,- մեջբերում է Welt-ը կոալիցիոն համաձայնագրից հատվածներ։

Ընդ որում, նշվում է, որ Գերմանիայում բնակության ժամկետը, որն անհրաժեշտ է քաղաքացիության ընդունման դիմում ներկայացնելու համար, ութից կնվազեցվի մինչեւ հինգ տարի, իսկ որոշ դեպքերում՝ մինչեւ երեք տարի։ Բացի այդ, Գերմանիայի Դաշնային Հանրապետության ապագա նախարարների կաբինետը մտադիր է վերանայել օտարերկրացիներից ծնված երեխաներին քաղաքացիություն ընդունելու մասին դրույթները։ «Գերմանիայում օտարերկրյա ծնողներից ծնված երեխաները ծնվելու պահին Գերմանիայի քաղաքացիներ են դառնում, եթե ծնողներից մեկը 5 տարի օրինական կերպով ապրել է Գերմանիայում», - ասվում է տեքստում:

Կողմերը նաեւ ձգտում են էապես պարզեցնել աշխատանքային միգրանտների քաղաքացիություն ստանալու ընթացակարգը՝ այդ թվում նվազեցնելով նրանց լեզվի իմացության մակարդակը։