Կասկած չկա, որ զինված հակամարտությունը հրահրել էր Ադրբեջանը. Երևանի և Բաքվի միջև բռնության նոր սրացում է հասունանում. Neue Zürcher Zeitung

«Արդեն մի քանի ամիս է, ինչ պոտենցիալ հեռուն գնացող հետևանքներով սահմանային հակամարտություն է ընթանում պատերազմող հարևանների միջև: Թվում է, թե Ադրբեջանը փորձում է իր օգտին փաստեր ստեղծել»,- գրում է շվեյցարական Neue Zürcher Zeitung թերթը, որի հոդվածը թարգմանաբար ներկայացրել է InoPressa-ն:

«Երեքշաբթի կեսօրին Հայաստանի և Ադրբեջանի սահմանային գոտում սկսվել են մեկ տարի առաջ Լեռնային Ղարաբաղի շուրջ պատերազմի ավարտից ի վեր ամենակատաղի մարտերը։ Ադրբեջանական ստորաբաժանումները, ըստ ամենայնի, ներխուժել են հայկական տարածք Սիսիան քաղաքի մոտ և ավելի հյուսիս՝ Վարդենիսի մոտ՝ Քելբաջարի շրջանից (հայերեն՝ Քարվաճառ) ոչ հեռու, որն արդեն մեկ տարի է, ինչ Ադրբեջանի կազմում է:

Հայկական կողմը սկզբում խոսում էր 15 զոհի մասին, ավելի ուշ ՊՆ-ն հաստատել է, որ կա մեկ զոհ, 12 զինծառայող գերի է ընկել ադրբեջանցիներին, հայկական զինուժը կորցրել է երկու դիրք: Ադրբեջանի կողմից ոչ պաշտոնական տեղեկություններ են տարածվել 14 զոհի, 37 վիրավորի և 5 անհետ կորածի մասին։ Մարտերում կիրառվել են հրետանի, հրթիռային կայանքներ, զրահատեխնիկա:

Հայաստանը դիմել է Եվրոպայի անվտանգության և համագործակցության կազմակերպությանը, ՄԱԿ-ի Անվտանգության խորհրդին և ռազմական դաշինքին՝ Հավաքական անվտանգության պայմանագրի կազմակերպությանը։ Նա նաև կոչ է արել Ռուսաստանին պաշտպանել իր տարածքային ամբողջականությունը 1997 թվականի պայմանագրի համաձայն:

Հայաստանի Գյումրի քաղաքում ռուսական ռազմակայանը բերվել է մարտական պատրաստության: Նախօրեին պաշտոնը ստանձնած իր գործընկեր Սուրեն Պապիկյանի հետ հեռախոսազրույցից հետո ՌԴ պաշտպանության նախարար Սերգեյ Շոյգուն կարողացել է միջնորդել հրադադարի համաձայնագիրը»,- ասվում է հոդվածում։

Թերթը հիշեցնում է, որ «Ադրբեջանը հայերին մեղադրել է մեկ տարի առաջ պատերազմի ավարտից հետո իրենց վերադարձած տարածքներում սահմանների ամրապնդման գործընթացում սադրանքների իրականացման համար»։

«Հաշվի առնելով վերջին շաբաթների և ամիսների նախապատմությունը և ադրբեջանցիների հռետորաբանությունը, կասկած չկա, որ զինված հակամարտությունը հրահրել է Ադրբեջանը. նախագահ Իլհամ Ալիևը փորձում է հավելյալ դիվիդենտներ կորզել 2020 թվականի նոյեմբերի հրադադարից հետո իր ռազմական հաջողություններից և անընդհատ հեգնում է Հայաստանին:

Ալիևի գլխավոր նպատակն է ուղիղ կապ ստեղծել Ադրբեջանի և նրա էքսկլավ Նախիջևանի միջև, որը շրջապատված է Հայաստանով, Իրանով և Թուրքիայով։ Այդ նպատակով նա ցանկանում է «միջանցք» կառուցել Հայաստանի ամենահարավային մարզով՝ Սյունիքով (կոչվում է նաև Զանգեզուր):

Թեև դա ֆորմալ առումով համապատասխանում է 2020 թվականի նոյեմբերի 9-ի հրադադարի համաձայնագրի պահանջներին, ըստ որի՝ տարածաշրջանում բոլոր հաղորդակցության ուղիները պետք է բացվեն, Ադրբեջանի առաջարկը նախատեսում է Հայաստանի տարածքով արտատարածքային երկաթուղային գծի ստեղծում»,- գրում է թերթը՝ նկատելով, որ «սա երկիրը երկու մասի կբաժանի, ուստի անընդունելի է հայկական կողմի համար՝ առավելևս այն պարագայում, որ Ալիևը բազմիցս հասկացրել է, որ ամբողջ Զանգեզուրի շրջանը համարում է ադրբեջանական տարածք»։

Աղբյուրը նկատում է, որ «Ռուսաստանի, Հայաստանի և Ադրբեջանի միջև Հարավային Կովկասում տրանսպորտային ուղիների բացման շուրջ մեկ տարի շարունակվող բանակցությունները փակուղի են մտել»։

«Մինչ Եվրոպան լարված հետևում է լեհ-բելառուսական սահմանին միգրացիոն ճգնաժամին և Ուկրաինայի հետ սահմանին ռուսական զորքերի առեղծվածային կուտակմանը, Բաքուն, հավանաբար Թուրքիայի աջակցությամբ, փորձում է փաստեր ստեղծել իր ոխերիմ թշնամու՝ Հայաստանի հետ հարաբերություններում։ Դա, հավանաբար, կուժեղացնի ներքաղաքական ճնշումը Փաշինյանի նկատմամբ»,- եզրափակում է Neue Zürcher Zeitung-ը։