Հայաստանում չկա իշխանություն, որը կկարողանա կենտրոնաձիգ ձևով արձագանքել այս ամենին. Գեղամ Մանուկյան

Այսօր Հայաստանի Հանրապետությունում չկա իշխանություն։ Այս մասին այսօր՝ նոյեմբերի 16-ին, Ազգային ժողովում լրագրողների հետ զրույցում ասել է «Հայաստան» խմբակցության պատգամավոր Գեղամ Մանուկյանը՝ անդրադառնալով հայ-ադրբեջանական սահմանին ստեղծված լարված իրավիճակին։

«Թշնամու կողմից ամիսներ շարունակ տեղի ունեցող գործողությունները ունեին տրամաբանական հակահայկական շարան։ Երբ մայիսի 12-ին առաջին գործողությունները եղան Սև լճի տարածքում, և իշխանությունները տեղական ժամանակ փորձում էին չքմեղանալ, ամեն ինչ հստակ էր, որ թշնամին ընտրել է մի տարածք, որով կկտրի Սյունիքի հատվածը։ Այս ամենն ունի հստակ ռազմական նպատակ։ Երեկ շատ արագ, առանց որևէ հիմնավորման փոխվեց Պաշտպանության նախարար։ Հիշեցնեմ՝ 2020 թվականի ռազմական գործողությունները՝ Հայաստանի Պաշտպանության նախարարը բացակայում էր Հայաստանից։ Այսօր Հայաստանի Հանրապետությունում չկա իշխանություն, իշխանություն, որը կենտրոնաձիգ կերպով կարձագանքի այս ամենին։ Ազգային ժողովի իշխանական պատգամավորների շատ արագ ՀԱՊԿ-ին դիմելու, Ռուսաստանին ակնարկներ անելու հայտարարությունները նաև ինչ-որ տեղ այլ նպատակաների մասին ակնարկներ են»,- նշեց նա։

Մանուկյանը հիշեցրեց, որ երեկ «Հայաստան» և «Պատիվ ունեմ» խմբակցությունները երեկ հանդես էին եկել նախաձեռնությամբ, որով առաջարկում էին քննարկել ստեղծված իրավիճակը։

«Այս իշխանության համար դրանք էական հարցեր չէին, կարևորը սնդիկի մասին օրենքում ինչ-որ հիմար փոփոխություններ էին»,- ընդգծեց Մանուկյանը։

Գեղամյանը՝ անդրադառնալով հայ-ադրբեջանական սահմանին ստեղծված լարված իրավիճակին, կարծում է, որ տեղեկատվական դաշտում կցկտուր տեղեկություններ են տրվում։

«Փաշինյանի ընտանեկան թերթը դարձել է թիվ 1 լրատվական աղբյուրը, որին հղում է տալիս նույնիսկ Հայաստանի Հանրային հեռուստաընկերությունը։ Այս իշխանությունը տեւական ժամանակ փլուզել է ամբողջ պետական համակարգը։ Պաշտպանության նախարարությունը մեկ տարուց ավել չունի մամուլի քարտուղար։ Սա արդեն խոսուն փաստ է, թե ինչպես է այս իշխանությունը պատրաստվում նման արտակարգ իրավիճակների»,- նշել է նա։