Ասել են՝ 15-17 գերի է վերադառնալու, բայց տղաս չկա. արդեն 1.5 տարի է՝ խաբում են, ոչինչ չեն ասում. անհետ կորածի հայրը կոչ էր անում հավաքվել Կառավարության առջև և բողոքի ակցիա կազմակերպել
Արդեն 1.5 տարի է՝ երեխաս չկա, ոչ մի տեղեկություն չունենք, ու ամեն անգամ խաբում են: Այս մասին «Էրեբունի» օդանավակայանում լրագրողների հետ զրույցում երեկ երեկոյան հայտնել է անհետ կորածի հայր Գալուստ Մազմանյանը:
Նա հայտնել է, որ ՀՀ պաշտպանության նախարարը հոկտեմբերի 18-ին անհետ կորածների և գերիների հարազատներին հայտնել էր, որ մոտ 15-17 գերի է վերադառնալու մոտ օրերին Հայաստան, բայց չէր հստակեցվել՝ իր որդին լինելու՞ է վերադարձողների մեջ, թե ոչ:
«Որդուս անունն անհետ կորածների ցուցակում է՝ նա կամավոր է մեկնել պատերազմ, ժամկետային զինծառայող է եղել 2016թ. Ապրիլյան պատերազմի ժամանակ, շուտով 25 տարեկան կդառնա: Վերջին անգամ 2020թ. հոկտեմբերի 6-ին եմ տղայիս հետ խոսել, դրանից հետո կապը կորել է, Հորադիզում է եղել:
Վաղվանից պետք է հավաքվենք կառավարության դիմաց՝ ծնողներ ջան, վաղը՝ ժամը 10:00-ին, հավաքվենք կառավարության դիմաց, չասեք՝ հիվանդ ենք, ինչ ենք, եկեք: Արդեն հունից հանում են ծնողներին, չեն ասում ոչ մի բան մեզ, միշտ խաբել են մեզ»,- նշեց անհետ կորածի հայրը: