Օվերչուկ. ՌԴ-ն եւ ՀՀ-ն ունեն բոլոր հնարավորությունները լայնածավալ ենթակառուցվածքային նախագծեր իրականացնելու համար
Ռուսաստանն ու Հայաստանն ունեն բոլոր հնարավորությունները՝ կայուն եւ դինամիկ զարգացման, բազմակողմանի փոխգործակցության համար՝ ինչպես առեւտրային, այնպես էլ տնտեսական եւ հումանիտար ոլորտներում, ինչպես նաեւ՝ լայնածավալ ենթակառուցվածքային նախագծերի իրականացման համար: Այս մասին հոկտեմբերի 19-ին ռուս-հայկական ութերորդ միջտարածաշրջանային ֆորումի լիագումար նիստի մասնակիցներին ուղղված իր ուղերձում ասել է Ռուսաստանի փոխվարչապետ Ալեքսեյ Օվերչուկը:
Նրա խոսքով՝ միջտարածաշրջանային համագործակցությունը մեծ ներդրում ունի այդ գործում:
«Նախապատրաստվել է միջտարածաշրջանային համագործակցության ծրագիր 2022-2027 թվականների համար: Համոզված եմ, որ Ռուսաստանի տարածաշրջանների հետ Հայաստանի հետագա համագործակցությունն օգուտ կբերի մեր եղբայրական երկրների ժողովուրդներին»,- ասել է նա:
Օվերչուկը հավելել է, որ ռուս-հայկական ութերորդ միջտարածաշրջանային ֆորումի անցկացումն ընդգծում է հարաբերությունների սերտ դաշնակցային բնույթը:
«Մեր երկրներն ու ժողովուրդները կապված են բարեկամությամբ եւ ընդհանուր դարավոր պատմությամբ: ԵԱՏՄ այլ երկրների հետ միասին մենք բարենպաստ միջավայր ունեցող ընդհանուր շուկաներ ենք ձեւավորում, որոնք նախատեսված են Միության անդամ երկրների ավելի քան 182 միլիոն քաղաքացիների համար: Վստահ եմ, որ ինտեգրումը կշարունակվի` ի շահ մեր ժողովուրդների կենսամակարդակի բարձրացման», - եզրափակել է Ռուսաստանի փոխվարչապետը: