ՄԱԿ-ի գլխավոր քարտուղարն աշխարհի ամենահարուստ մարդուն քննադատել է «մանկության երազանքի» վրա միլիոնավոր դոլարներ ծախսելու համար

ՄԱԿ-ի գլխավոր քարտուղար Անտոնիո Գուտերեշն աշխարհի ամենահարուստ մարդուն՝ գործարար Ջեֆ Բեզոսին, քննադատել է վերջերս տիեզերք կատարած թռիչքի համար:

Ինչպես գրում է Luxury Launches-ը, գլխավոր քարտուղարի խոսքով՝ միլիարդատերերը, որոնց թվում են Բեզոսն ու անգլիացի գործարար Ռիչարդ Բրենսոնը (նա ևս թռչել է տիեզերք), «ժամանցային ուղևորություններ» են կատարում դեպի տիեզերք՝ անտեսելով մոլորակի բազմաթիվ խնդիրները, այդ թվում՝ սովի ճգնաժամը:

Գուտերեշի խոսքով՝ այն ֆոնին, երբ միլիոնավոր մարդիկ քաղցած են, անտեղի է միլիարդատերերի կողմից ահռելի գումարների վատնումը դեպի տիեզերք ժամանցային թռիչքներ կատարելու համար:

ՄԱԿ-ի գլխավոր քարտուղարի համոզմամբ՝ սա աղքատների և հարուստնեի միջև ահռելի անդունդի առկայության ցուցադրություն է:

«Ծնողներն իրենց երեխաների համար տեսնում են ապագա, որը գնալով ավելի մռայլ է թվում, քան այսօրվա պայքարն է, միևնույն ժամանակ նրանք տեսնում են, որ «միլիարդատերերը հանուն զվարճանքի տիեզերք են թռնում, իսկ միլիոնավոր մարդիկ սոված են Երկրի վրա»,-ասել է Գուտերեշը՝ ընդգծելով, որ փոխարենը միլիարդատերերը պետք է սկսեն ավելի մեծ հարկեր վճարել և չկենտրոնանալ իրենց երազանքների վրա:

Աղբյուրը նկատում է, որ մինչ երկրացիները տառապում են COVID-19-ի արգելափակումներից և մնում են գործազուրկ, Բեզոսը դեպի տիեզերք թռիչքի մեկ տեղի համար ծախսել է մոտ 28 միլիոն դոլար: Միլիարդատերն ավելի վաղ խոստովանել էր, որ դեպի տիեզերք թռչելն իր մանկության երազանքն է եղել: