Սաակաշվիլին չի համարձակվի վերադառնալ. «Վրացական երազանք»-ի ղեկավար

Վրաստանի նախկին նախագահ Միխեիլ Սաակաշվիլին, որը հայտարարել էր, որ հայրենիք է վերադառնալու տեղական ինքնակառավարման մարմինների ընտրությունների համար, ըստ էության, չի կարողանա դա անել: Այս մասին կիրակի լրագրողներին ասել է իշխող «Վրացական երազանք - ժողովրդավարական Վրաստան» կուսակցության ղեկավար Իրակլի Կոբախիձեն, գրում է ՏԱՍՍ-ը:

«Կարճ կասեմ. Սաակաշվիլին չի համարձակվի վերադառնալ: Նրա համար դժվար չի լինի գտնել դրա պատճառները: Նա կարող է դրա համար ինչ-որ մեկին մեղադրել, բայց մի խոսքով՝ կասեմ, որ նա չի համարձակվի դա անել: Մենք գիտենք, որ նա դրա համար ոչ կարողություններ ունի, ոչ էլ ռեսուրսներ», - ասել է Կոբախիձեն:

Սաակաշվիլին սեպտեմբերի 6-ին հայտարարել է, որ մտադիր է վերադառնալ հայրենիք՝ մասնակցելու ՏԻՄ ընտրություններին, որոնք նախատեսված են հոկտեմբերի 2-ին: Նա հավելել է, որ իր երթուղու և ժամանման ճշգրիտ ամսաթվի մասին հրապարակավ կհայտարարի:

Սաակաշվիլին Վրաստանի նախագահն էր 2004 թվականի հունվարից մինչև 2013 թվականի նոյեմբեր: 2013 թվականին նա լքել է երկիրը նախագահական լիազորությունների ավարտից մի քանի օր առաջ: Դրանից անմիջապես հետո նրա դեմ հարուցվել է չորս քրեական գործ, որոնցից երկուսով արդեն կան վճիռներ:

2018 թվականի հունվարին Թբիլիսիի քաղաքային դատարանը Սաակաշվիլիին հեռակա կարգով դատապարտել է երեք տարվա ազատազրկման 2006 թվականին Վրաստանի Միացյալ բանկի աշխատակից Սանդրո Գիրգվլիանիի սպանության համար:

2018 թվականի հունիսի 28-ին դատարանը նրան դատապարտել է վեց տարվա ազատազրկման՝ 2005 թվականին պատգամավոր Վալերի Գելաշվիլիի ծեծի գործով:

Ներկայում Սաակաշվիլին ապրում է Կիևում և զբաղեցնում է Ուկրաինայի բարեփոխումների խորհրդի գործադիր կոմիտեի նախագահի պաշտոնը: