на Русском
Վահագն Խաչատուրյանն ընդունել է Ֆրանսահայերի խ... 
Ոստիկանությունը բիրտ ուժ է կիրառում․ լարված ի... 
Թուրքիայի կողմից դրական ազդակներին կարելի է հետևել նրանց պետական իշխանության կողմից արված հայտարարություններում. դրանց տոնը, բովանդակությունը լրիվ այլ է, քան մեկ տարի առաջ. Գուրգեն Արսենյան
Կառավարության գործունեության ծրագրի արտաքին քաղաքականության հատվածում հստակ նշված է, որ ՀՀ-ն իր օրակարգ է մտցնում խաղաղության հարցը: Այդ հարցի քննարկման մեր օպոնենտները մեր հարևաններն են, որոնց հետ այս պահին կա՛մ ընդհանրապես չունենք հարաբերություն, կա՛մ ունենք լարված, ոչ դրացիական կամ թշնամական հարաբերություններ: Այս մասին Եռաբլուրում լրագրողների հետ զրույցում ասաց ԱԺ «Քաղաքացիական պայմանագիր» խմբակցության պատգամավոր Գուրգեն Արսենյանը՝ անդրադառնալով Թուրքիայի նախագահի հայտարարությանը, թե ՀՀ վարչապետը Վրաստանի ղեկավարի միջոցով նրան հանդիպման առաջարկ է արել:
«Քաղաքական օրակարգի սպասարկման և ՀՀ անվտանգության միջավայրն ավելի կայուն և հասկանալի դարձնելու համար բնականաբար խնդիրը պետք է քննարկել այն սուբյեկտների հետ, որոնցից այդ վտանգը կա: Մեր խաղաղության օրակարգի քննարկումը պետք է անցկացնենք մեր հարևանների, այդ երկրների ղեկավարության հետ»,-ասաց նա:
Հարցին՝ Էրդողանը ՀՀ-ից սպասվելիք ի՞նչ դրական քայլերի մասին էր խոսում, Արսենյանն արձագանքեց՝ ՀՀ իշխանությունների կողմից դրական քայլերի սպասելիքը արվել է՝ Կառավարության ծրագրում ընդգրկվել է խաղաղության օրակարգը:
«Դա մի կարևորագույն հրապարակում է մեր մտադրությունների վերաբերյալ, ի լուր աշխարհի հնչեցում, որ մենք գնում ենք խաղաղության օրակարգով: Դրա փաստաթղթային մասից բխում են գործընթացներ, քայլեր, որոնք կանեն իրավասու մարմինները՝ ելնելով ՀՀ անվտանգության շահերից: Այն պահին, երբ կսկսենք քննարկել մեր հարաբերությունների կարգավորման խնդիրները Թուրքիայի հետ, այդ պահին պետք է քննարկենք այն պետական պաշտոնյաների հետ, որոնք ունեն այդ քննարկման իրավասությունները: Թուրքիայի նախագահը Ռեջեփ Թայիփ Էրդողանն է, կքննարկենք իր հետ, կփոխվի նախագահը, կքննարկենք այդ ղեկավարի հետ»,-ասաց պատգամավորը:
Հարցին՝ որո՞նք են Թուրքիայի կողմից դրական ազդակները, որոնց մասին հայտարարել է Նիկոլ Փաշինյանը, Արսենյանն արձագանքեց՝ այդ ազդակների վերաբերյալ կարելի է հետևել թուրքական պետական իշխանության ներկայացուցիչների կողմից արված հայտարարություններին:
«Հայտարարությունների տոնը, բովանդակությունը լրիվ այլ է, քան մեկ տարի առաջ: Եթե հիշենք 1 տարի առաջ Թուրքիայի իշխանությունների կողմից արվող հայտարարությունները, այդ թվում՝ օգոստոսի կեսերին Թուրքիայի ԳՇ պետի կողմից արված հայտարարությունը, ապա կհասկանանք, որ լրիվ փոխվել է այդ հայտարարությունների տոնը և բովանդակությունը: Այն ժամանակ այդ հայտարարություններին հետևեց 44-օրյա պատերազմը: Մենք այնքան էլ խորությամբ ու պետական գործիչներին հատուկ խորաթափանցությամբ չհասկացանք, թե ինչ էր նշանակում այդ հայտարարության ներքին բովանդակությունը, մենք ստացանք զգուշացում, հետո պատերազմ»,-ասաց նա՝ նշելով, թե այժմ փոխվել է բովանդակությունը:
«Ես թուրքական կառավարության, իշխանությունների ներկայացուցիչը չեմ, ես հայկական քաղաքական համակարգի ներկայացուցիչ եմ, որը պատասխանատվություն է կրում երկրի համար»,-հավելեց Արսենյանը:
