Իշխանությունները հասկանում են, որ մեծանում է իրենց հեռացնելու հասարակական պահանջը, փորձում են վախեցնել. Արթուր Ղազինյանը այցելել է բերման ենթարկված քաղաքացիներին
Այս պահին Կենտրոնի ոստիկանության բաժանմունքում գտնվում են բերման ենթարկված 8 քաղաքացիներ` իրենց ձևակերպմամբ ոստիկանության օրինական պահանջին չենթարկվելու համար։ Այս մասին ասաց ԱԺ «Հայաստան» դաշինքի պատգամավոր Արթուր Ղազինյանը, ով այցելել էր բերման ենթարկված քաղաքացիներին։
Ղազինյանը նշեց, որ քաղաքացիներին որևէ օրինական պահանջ ներկայացված չի եղել։
«Տեղի է ունեցել ՔՕ 309-րդ հոդվածի հատկանիշներով արարք, այսինքն ոստիկանության աշխատակիցների կողմից թույլ է տրվել իրենց լիազորությունների վերազանցում։ Ոստիկանության գործողություններին պետք է տրվի քրեաիրավական գնահատական»։
Ղազինյանը նշեց, որ բողոքի ակցիայի մասնակիցների երթը թույլ չտալու հիմնական պատճառը վախն է.
«Իրենք հասկանում են, որ օրեցօր մեծանում է իշխանությունների նկատմամբ ատելությունը, խորանում է նրանց հեռացնելու պահանջը, նրանք փորձում են բիրտ ուժի միջոցով վախի մթնոլորտ տարածել հասարակության մեջ և հասարակության ըմբոստ զանգվածին թույլ չտալ դուրս գալ փողոց»։
Պատգամավորի խոսքով՝ անընդունելի է որևէ գունագեղ միջոցառման իրականացումը։
«Պետք է լինի կոնկրետ պետականության խորհրդանիշների վրա հիմնված, 30 տարվա կատարվածի հաշվետվության, ձեռքբերումների վրա հիմնված միջոցառում։ Քանի մեր զինվորների մարմինները փտում են սառնարաններում, քանի չեն հայտնաբերվել անհետ կորած զինծառայողները, անկախության որևէ միջոցառում չպետք է լինի։ Այդ օրը պետք է նշել, բայց ոչ տոնակատարությամբ»,- ասաց Ղազինյանը։