Սաուդցի արքայազնը հայտարարել է, որ ԱՄՆ-ը չպետք է Patriot հրթիռները դուրս բերի Սաուդյան Արաբիայից
Սաուդյան Արաբիան ցանկանում է, որ ԱՄՆ-ը ցույց տա իր նվիրվածությունը թագավորությանը, ինչը նշանակում է, որ ԱՄՆ-ի պաշտպանական սարքավորումները կմնան Սաուդյան Արաբիայում, CNBC-ի հետ հարցազրույցում ասել է արքայազն Թուրքի ալ Ֆեյսալը:
«Կարծում եմ՝ մեզ պետք է հավաստիացնեն, որ ԱՄՆ-ն նվիրված է թագավորությանը», - ասել է Սաուդյան Արաբիայի հետախուզության նախկին ղեկավարը՝ պատասխանելով հարցին, թե ինչ է պետք Մերձավոր Արեւելքին ԱՄՆ-ից՝ Աֆղանստանում թալիբների իշխանության գալուց հետո: «Օրինակ՝ հրաժարվել Սաուդյան Արաբիայից Patriot հրթիռների դուրսբերումից այն ժամանակ, երբ Սաուդյան Արաբիան հրթիռային հարձակումների եւ անօդաչուների հարձակումների թիրախ է դառնում ոչ միայն Եմենի, այլ նաեւ Իրանի կողմից», - ասել է նա:
Միացյալ Նահանգները Սաուդյան Արաբիայում ավելացրել է իր ռազմական ներկայությունը 2019 թվականին՝ երկու Patriot հրթիռահրետանային մարտկոցներ տեղակայելով երկրի նավթային օբյեկտների վրա հարձակումներից հետո: Վաշինգտոնը մեղադրել է Իրանին հարվածներ հասցնելու մեջ, չնայած Թեհրանը հերքել է մեղադրանքները:
Այս տարվա հունիսին մի քանի ԶԼՄ-ներ հայտնել են, որ Պենտագոնը որոշում է կայացրել Մերձավոր Արեւելքից դուրս բերել ՀՕՊ միջոցները՝ ներառյալ Patriot հրթիռային մարտկոցները:
Patriot հրթիռների դուրսբերումը «չի վկայում ԱՄՆ մտադրության մասին՝ աջակցել Սաուդյան Արաբիային պաշտպանվել արտաքին թշնամիներից», - ասել է Ալ Ֆեյսալը:
Արքայազն Թուրքին ասել է, որ Սաուդյան Արաբիան կնախընտրեր ստանալ ԱՄՆ-ի աջակցությունը, սակայն փնտրում է «այլ աջակցություն»՝ իր հակաօդային պաշտպանությունը ուժեղացնելու համար՝ «Իրանի եւ Եմենի հութիների հարձակումներին» դիմակայելու համար:
Նրա խոսքով՝ ԱՄՆ-ը պետք է լրջորեն մտածի Մերձավոր Արեւելքին աջակցություն ցուցաբերելու մասին, հատկապես Աֆղանստանից ամերիկյան ուժերի քաոսային դուրսբերումից եւ Քաբուլում շարունակվող ճգնաժամից հետո: