Երևանի 21-ամյա և 30-ամյա բնակիչները Դրախտիկ գյուղի մոտ կոտրել են «Հունդաի» մակնիշի մեքենայի ապակին և գողություն կատարել. Ոստիկանություն (տեսանյութ)

Սեպտեմբերի 2-ին ոստիկանությանը Երևանի մի բնակիչ հայտնել էր, որ Գեղարքունիքի մարզի Դրախտիկ գյուղի մոտ իր մեքենայից գողություն են արել: Այս մասին հայտնում է Ոստիկանությունը:

Ահազանգով դեպքի վայր է մեկնել ոստիկանության Ճամբարակի բաժնի օպերատիվ խումբը: Մեքենայատերը հաղորդում է տվել, որ ժամը 18-ի սահմաններում կոտրել են իր «Հունդաի» մակնիշի մեքենայի ապակին և գողացել թռչող տեսանկարահանող սարք, կնոջ բջջային հեռախոսն ու պայուսակը, որի մեջ եղել է անձնագիր, բանկային և սոցիալական քարտեր, գումար: Ընդհանուր վնասը մոտ 1 միլիոն 260 հազար դրամի էր:

Ճամբարակի ոստիկանների ստացած օպերատիվ տեղեկություններն իրացվել են Գեղարքունիքի մարզային և Երևան քաղաքի վարչությունների, Դավիթաշենի բաժանմունքի ու Սևանի բաժնի գործընկերների հետ: Պարզվել է, որ գողությունը կատարել են 21 և 30 տարեկան երևանցի երկու երիտասարդ` «ՎԱԶ-2121» մակնիշի մեքենայով: Արդեն առավոտյան` սեպտեմբերի 3-ին, ժամը 10.20-ին, նրանք հայտնաբերվել են մայրաքաղաքում և, մեքենայով հանդերձ, բերման ենթարկվել ոստիկանության Սևանի բաժին, որտեղ տվել են խոստովանական բացատրություն:

Գողոնը մասամբ հայտնաբերվել է: Ձեռնարկվում են միջոցառումներ՝ մյուս մասը հայտնաբերելու ուղղությամբ: Հանգամանքները պարզվում են: