Ռիո Դե Ժանեյրոն կորոնավիրուսային սահմանափակումների վերացումը կնշի քառօրյա տոնակատարություններով
Ռիո Դե Ժանեյրոյի իշխանությունները հայտնել են, որ սեպտեմբերի 2-ից 5-ը քառօրյա տոնակատարությունների միջոցով կնշեն քաղաքում կորոնավիրուսային սահմանափակումների ավարտը, հայտնում է «ՌԻԱ Նովոստի» լրատվական գործակալությունը։
Քաղաքային իշխանությունները նախատեսում են մինչև սեպտեմբեր բնակչության 77 տոկոսին ներարկել պատվաստանյութի առնվազն մեկ չափաբաժինն ու 45 տոկոսին ամբողջությամբ պատվաստել։
Առաջին փուլով, որը կիրագործվի սեպտեմբերի 2-ից հոկտեմբերի 17-ը, կվերացվեն բացօթյա միջոցառումների վերաբերյալ սահմանափակումները, սակայն ամեն ինչ կիրականանա դիմակ կրելու ռեժիմի պահպանմամբ։ Հոկտեմբերի 17-ից նախատեսվում է վերացնել ամբողջությամբ պատվաստված մարդկանց վերաբերող սահմանափակումները, իսկ նոյեմբերի 15-ից դիմակների առկայությունը պարտադիր կլինի միայն հիվանդանոցներում և հասարակական տրանսպորտում։
«Մենք գիտենք, որ Ռիոն կրկին կյանքի կվերադառնա։ Մենք կարող ենք հրաժարվել այս ծրագրից, սակայն, մեր տվյալների համաձայն, իրավիճակը շտկվում է։ Շատ շուտով մենք կհաղթահարենք մեր կյանքի այս վատ փուլը», - ասել է Ռիո Դե Ժանեյրոյի քաղաքապետ Էդուարդո Պաեշը։
Սեպտեմբերի 2-ին, որը կդառնա քաղաքի «Վերամիավորման օրը», նաատեսվում է անցկացնել աշխարհի ամենամեծ ռոք փառատոններից մեկը՝ Rock in Rio անվանմամբ։