Եթե Խորհրդարանում կարող ենք այսպիսի անվտանգություն ապահովել, ինչո՞ւ էին մեր սահմանը հատող ադրբեջանցիներին հովիվները դիմավորում․ Թագուհի Թովմասյան (տեսանյութ)
Խորհրդարանի ձևավորման օրվանից ավանդույթ կա մեր երկրում և այդ ավանդույթի դրսևորումն այն է, որ լրագրողները ազատ կարողանում են Աժ-ում շրջել և իրենց հարցերի պատասխանը ստանալ։ Ինչո՞ւ են խուսափում լրագրողներից։ Այս մասին լրագրողների հետ ճեպազրույցի ժամանակ ասաց ԱԺ անկախ պատգամավոր Թագուհի Թովմասյանը՝ անդրադառնալով Աժ-ում լրագրողների ազատ տեղաշարժի արգելքին։
Պատգամավորը անդրադարձավ ԱԺ-ում անվտանգության նոր, ստուգող համակարգի ներդրմանը՝ նշելով՝ դա նվաստացուցիչ է. «Ինչի՞ց են վախենում, ես չեմ հասկանում։ Եթե մենք այսպիսի անվտանգային միջավայր կարող ենք ստեղծել լոկալ պայմաններում, ինչո՞ւ են մեր սահմանները անվտանգային առումով այսքան բաց և սահմանը հատող ադրբեջանցի զինվորներին ինչո՞ւ են հովիվները դիմավորում։ Պետք էր առաջին հերթին ապահովել սահմանների, այլ ոչ թե խորհրդարանի անվտանգությունը»։
Պատգամավորը նշեց, որ պատրաստվում է վիճարկել այդ որոշումը դատարանում, կամ խորհրդարան նոր նախագիծ բերելով։
Անդրադառնալով Գեղարքունիքի մարզում սահմանային ներկա իրադրությանը՝ Թովմասյանը նշեց, որ նախօրեին է վերադարձել Վարդենիսից և փաստեց, որ կրակոցները պակաս ակնհայտորեն, բայց առկա են։ «Վտանգավորության աստիճանը չի թուլանում։ Երեկ տեսաք, որ ԱԹՍ էր են խոցվել։ Որքան էլ ասենք, որ հրադադարի ռեժիմը պահպանվում է, այնուամենայնիվ, սահմանային շրջանների բնակիչները անվտանգության խնդիր ունեն։ Երբ այս իշխանությունը հաղթանակ էր տոնում և հրավառություն անում, պետք է առաջին հերթին մտածեր սահմանային անվտանգության մասին»,- ասաց Թովմասյանը։
Թովմասյանի կարծիքով՝ Ադրբեջանը ունի իրեն տված խոստումներ և երաշխիքներ, ուստի սադրանքներով փորձում է արագացնել այդ խոստումների կատարումը։
«Թուրք -ադրբեջանական տանդեմը, որին միացել են մահմեդական ծայրահեղական խմբեր, տարածաշրջանում ունեն հետաքրքրություններ և նպատակադրված գնում են դրանց կատարմանը, ուստի պետք է ուղղենք մեր բանակի մեջքը և հույս չդնել այլ բանակի զինուժի համար, դա անընդունելի է», -ասաց Թագուհի Թովմասյանը։