Լենա Նազարյանի ասած «իձյոտկա» արտահայտությունը նույնպե՞ս պետք է քրեականացվի այս օրենքով․ Սոֆյա Հովսեփյանը՝ հայհոյանքը քրեականացնող նախագծի մասին

Ինձ հետաքրքիր է՝ ինչպես պետք է կանխվի հասարակության կողմից իշխանությանը տրվող «անհայրենիք», «հողատու», «կապիտուլյանտ» բառերը։ Կամ ինչպես պետք է գնահատվի տիկին Նազարյանի ասած «իձյոտկա» արտահայտությունը։ Սրանք պետք է քրեականացվեն, թե ոչ։ Այս մասին ԱԺ արտահերթ նիստի ընթացքում ասաց Աժ անկախ պատգամավոր Սոֆյա Հովսեփյանը՝ անդրադառնալով օրակարգում գտնվող հայհոյանքը քրեականցնող նախագծին։

Հովսեփյանի կարծիքով՝ եթե այս արտահայտությունները նույնպես չբերվեն օրենքի դաշտ, ապա օրենքը չի հաջողելու։

Հարցին ի պատասխան՝ Արդարադատության նախարարի առաջին տեղակալ Քրիստինե Գրիգորյանը նշեց, որ այս նախագիծը ծայրահեղ խոսքի, հայհոյանքի մասին է։

«Մի քիչ դժվար է ձեր նշած բառերը վերագրել հայհոյանքին։ Նախագծով երաշխավորվել են մաքսիմալ երաշխիքներ, որ չունենանք սուբյեկտիվիզմ, բայց ոչինչ քարին գրված չէ։ Յուրաքանչյուր օրենքի կիրառման ընթացքում օրենսդիրը իրավունք ունի իր վերահսկողական գործառույթների շրջանակում մոնիթորինգ անել, թե արդյոք իրավակիրառ պրակտիկան գնացել է այն ուղղությամբ, որը ի սկզբանե օրենսդիրի կամքն էր եղել։

Գրիգորյանը նշեց, որ այս օրենքը միջանկյալ հրդեհը մարելու փորձ է, որին հաջորդելու են կոմպլեքս միջոցառումներ։

Ինչից հետո իր ելույթում Սոֆյա Հովսեփյանը անդրադարձավ հնչած կարծիքներին և շեշտեց, որ իր վերոնշյալ արտահայտություններից որոշ գործընկերներ նեղվել են.

«Քավ լիցի, մի՛ նեղացեք։ Այդ խոսքերը կան և դրանք չեք կարողանալու քրեականացնեք և այս օրենքը չի գործելու։ Հասարակության այդ արտահայտությունները մշտապես լինելու են, դրանք չենք կարողանալու կանխել, իսկ հայհոյանքներ գրեթե չկան»։

Պատգամավորը համաձայնեց Քրիստինե Գրիգորյանի այն խոսքի հետ, որ կրթության միջոցով պետք է կատարվի փոփոխությունը։

«Աճառյանական բառարանում այնպիսի բառեր կան, որ կարող ես այդ բառերը մեկ այլ տոնայնությամբ ասել և դրանք կարող են դառնալ հայհոյանք։ Ինչպես պետք է ապացուցեք այդ մարդը հայհոյել է, թե ոչ։ Միգուցե ուզում եք ինչ-որ բան փոխել, բայց չի փոխվելու, իզուր ժամանակ մի վատնեք և հասարակության ներսում այս նախ ագծով նորից բացասական վերաբերմունք մի առաջացրեք»,- ասաց Սոֆյա Հովսեփյանը։