Թունիսում բախումներ են տեղի ունեցել խորհրդարանի շենքի մոտ
Թունիսում բախումներ են տեղի ունեցել խորհրդարանի շենքի մոտ նախագահ Քաիս Սայեդի և «ան-Նահդա» կուսակցության կողմնակիցների միջև:
Ինչպես փոխանցում է «Կոմերսանտ»-ը` հղում անելով տեղի ռադիոկայանին, բախումների ժամանակ կողմերն իրար վրա քարեր և շշեր են նետել: Խորհրդարանի շենքի մոտ հավաքվածների թիվը գնահատվել է մի քանի հարյուր մարդ: Աղբյուրի տվյալներով` մի քանի մարդ է վիրավորվել կուսակցության աջակիցներից:
«Ան-Նահդա» կուսակցությունը գլխավորում է խորհրդարանի խոսնակ Ռաշիդ ալ-Գանուշին: Ավելի վաղ նախագահն աշխատանքից ազատել էր վարչապետ Հիշամ ալ-Մեշիշիին և սառեցրել խորհրդարանի աշխատանքը:
Reuters գործակալության տվյալներով` պաշտոնաթող վարչապետն իր տանն է գտնվում: Տեղի աղբյուրներից մեկի փոխանցմամբ` մի շարք քաղաքական գործիչներ փորձում են հեռանալ երկրից:
Նշենք, որ Վարչապետի պաշտոնանկության մասին լուրը հայտնի էր դարձել այսօր առավոտյան, ինչի ֆոնին բողոքի ցույցեր են սկսվել: Նախագահ Քաիս Սայեդը, մասնավորապես, ասել է, որ մտադիր է նոր վարչապետի օգնությամբ խաղաղություն հաստատել երկրում, սակայն այս քայլը նրա հակառակորդների կողմից որպես հեղաշրջում է որակվել։