Տիխանովսկայան Նյու Յորքում հանրահավաքի ժամանակ նշել է, որ չի վախենում Բելառուսում ռուսական զորքի «գործարկումից»

Բելառուսի նախագահի նախկին թեկնածու, ընդդիմության առաջնորդ Սվետլանա Տիխանովսկայան Նյու Յորքում կայացած հանրահավաքի ժամանակ նշել է, որ չի վախենում Բելառուսում ռուսական զորքերի «գործարկումից», գրում է «ՌԻԱ Նովոստի» լրատվական գործակալությունը և հավելում, որ Նյու Յորքում և հարակից շրջաններում բնակվող մի քանի հարյուր բելառուսներ կիրակի հավաքվել են Հուդզոն գետի ափին գտնվող Բեթերի զբոսայգում՝ նախագահի նախկին թեկնածուին հարցեր տալու համար։

Ի պատասխան այն հարցին, թե չի վախենում, որ Բելառուսում ռուս զինծառայողները կօգտագործվեն ընդդիմության դեմ, Տիխանովսկայան նշել է, որ նման սպառնալիք չի տեսնում։

«Ես փորձագետ չեմ։ Մենք փորձում ենք շփվել նրանց հետ, ովքեր ինչ-որ բան են հասկանում ռազմական գործերից: Չեմ կարծում, որ դա սպառնալիք է», - ասել է նախագահի նախկին թեկնածուն։

2020 թվականի օգոստոսին, Բելառուսում հակակառավարական ցույցերի գագաթնակետին, Ռուսաստանի Դաշնության նախագահ Վլադիմիր Պուտինն ասել էր, որ Բելառուսի նախագահի խնդրանքով ստեղծել է իրավապահ մարմինների աշխատակիցներից խումբ, որն անհրաժեշտության դեպքում գործի կանցնի: Նա հավելել էր, որ ուժերը գործի չեն անցնի, քանի դեռ ցուցարարները չեն անցել բոլոր սահմանները։ Սեպտեմբերին Բելառուսի նախագահ Ալեքսանդր Լուկաշենկոն հավելել էր, որ Ռուսաստանի իրավապահ մարմինների խումբը չի գործարկվել, և «Աստված չանի, գործարկվի»:

Հաջորդ հարցին՝ ՌԴ նախագահ Վլադիմիր Պուտինի գրասենյակից զանգ ստացվե՞լ է, Տիխանովսկայան բացասական պատասխան է տվել։ Ավելի վաղ նա նշել էր, որ կցանկանա երկխոսության մեջ մտնել Մոսկվայի հետ, սակայն ՌԴ իշխանություններն այլ դիրքորոշում ունեն։ ՌԴ արտաքին գործերի նախարարության պաշտոնական ներկայացուցիչ Մարիա Զախարովան էլ նշել էր, որ ՌԴ-ն ցանկություն չունի նպաստել փախուստի դիմած ընդդիմության օրինականացմանը։

Հիշեցնենք, որ Բելառուսի և արևմտյան երկրների հարաբերությունները սրվել են 2020 թվականին տեղի ունեցած նախագահական ընտրություններից հետո: Օգոստոսի 9-ին Բելառուսում կայացած նախագահական ընտրություններից հետո, որում վեցերորդ անգամ հաղթել է Ալեքսանդր Լուկաշենկոն, որը, ըստ ԿԸՀ-ի, հավաքել է ձայների 80,1%-ը, երկրում սկսվել են ընդդիմության զանգվածային բողոքի ակցիաները: Ընդդիմությունը կարծում է, որ Տիխանովսկայան է հաղթել և պահանջում է բանակցություններ վարել իշխանության փոխանցման և նոր ընտրությունների շուրջ: Նախկին թեկնածուն ընտրություններից անմիջապես հետո մեկնել է Լիտվա: Բելառուսի գլխավոր դատախազությունը քրգործ է հարուցել՝ իշխանությունը զավթելու կոչերի մասով: