Հայիթիի ոստիկանությունը երկրի նախագահի սպանության մեջ կասկածվող ևս երկու անձի է ձերբակալել

Հայիթիի ոստիկանությունը նախագահի սպանությանն առնչվելու կասկածանքով ևս երկու անձի է ձերբակալել, հաղորդում է ТАСС-ը:

Երկրի ոստիկանության ղեկավար Լեոն Շարելը հայտնել է, որ երկու ձերբակալվածներն էլ ոստիկաններ են:

Այսպիսով, նախագահի սպանության մեջ կասկածվող և ձերբակալված անձանց թիվը հասել է 23-ի, որոնցից 18-ը Կոլումբիայից եկած վարձկաններ են, իսկ երկուսը՝ հայիթական ծագմամբ ԱՄՆ քաղաքացիներ:

Հաղորդվում է, որ ևս մի քանի ոստիկան «մեկուսացման մեջ է», մինչև որ նրանց ձերբակալելու հարցով որոշում կկայացվի:

Հիշեցնենք, որ հուլիսի 7-ին անհայտ անձինք գրոհել էին Հայիթիի նախագահի նստավայրը, սպանել նրան և վիրավորել տիկնոջը: Հաղորդվել էր, որ առաջին տիկինը նույնպես մահացել է ստացած վնասվածքներից, սակայն ավելի ուշ այդ լուրը հերքվել էր: Երկրում ռազմական դրություն է հայտարարվել:

Հայիթիում նախագահ Ժովենել Մոիզի սպանության համար կասկածվող անձանցից 11-ը ձերբակալվել են երկրում Թայվանի դեսպանատանը։

Ավելի վաղ Կոլումբիայի պաշտպանության նախարարը հայտնել էր, որ Մոիզի սպանության համար կասկածվում են հարավամերիկյան այս երկրի թոշակի անցած զինվորականները։

Հայիթիի նախագահ Ժովենել Մոիզի սպանության գործի շրջանակում ձերբակալված ԱՄՆ քաղաքացիները հայտարարել են, որ վարձկանները պետության ղեկավարին սպանելու առաջադրանք չեն ունեցել: Վարձկանների նպատակը եղել է դատավորի հրամանով նախագահին ձերբակալելը, և ոչ թե սպանելը: