Ճապոնիայում մեկ օրում օլիմպիադայում ներգրավված 9 անձանց մոտ COVID-19 է հայտնաբերվել
Ճապոնիայում մեկ օրում ինը մարդու մոտ, որոնք մասնակցում են Տոկիոյում Օլիմպիական խաղերի անցկացմանը, կորոնավիրուս է հայտնաբերվել, ասված է զեկույցում:
Հիվանդությունը հայտնաբերվել է մեկ ճապոնացի կամավորի, վեց ճապոնացի կապալառուների եւ մեկ օտարերկրացու մոտ, որոնք կապված են խաղերի անցկացման հետ: Վարակը հաստատվել է նաև օլիմպիական գյուղի տարածքում գտնվող օտարերկրացի մարզիկի մոտ․ նա երկշաբաթյա կարանտինի մեջ է: Նշվում է, որ Օլիմպիադայի անցկացման գործում ներգրավված վարակված մարդկանց ընդհանուր թիվը հասել է 71-ի, այդ թվում՝ 31 օտարերկրացի:
Հուլիսի 18-ին Մեծ Բրիտանիայի հավաքականից 6 մարզիկներ և երկու մասնագետներ մեկուսացրել են Տոկիոյի հյուրանոցում կորոնավիրուսով վարակվածի հետ շփումից հետո: Ներկա պահին COVID-19-ի բոլոր ութ թեստերը բացասական են, Լոնդոնում հույս են հայտնել, որ նրանք շուտով կվերսկսեն մարզումները:
Տոկիոյում օլիմպիադան ու Պարալիմպիադան պետք է կայանար 2020 թվականի հուլիսի 24-ից օգոստոսի 9-ն ընկած ժամանակահատվածում: COVID-19 պանդեմիայի պատճառով մրցումները տեղափոխվել են մեկ տարով։ Այժմ դրանք կանցկացվեն 2021 թվականի հուլիսի 23-ից օգոստոսի 8-ը՝ առանց արտասահմանցի երկրպագուների մասնակցության։ Խաղերի անվանումը ՝ «Տոկիո-2020», պահպանվել է։
Հուլիսի 8-ին Տոկիոյի Օլիմպիական խաղերի կազմակերպիչները որոշել են թույլ չտալ տեղի բնակիչներին մասնակցել մայրաքաղաքի տարածաշրջանում կայանալիք մարզական միջոցառումներին: Այսպիսով, մրցումներն անցկացվելու են առանց հանդիսատեսի Տոկիոյում, Կանագավայում, Սայթամում և Տիբայում:
Հուլիսի 12-ից Տոկիոյում համաճարակային իրավիճակի վատթարացման պատճառով կրկին ուժի մեջ է մտել արտակարգ դրության ռեժիմը, որը կտևի մինչև օգոստոսի 22-ը: