Ալիևը Երասխում «կառչում» է «միջանցքից». 1in.am

Երբ Երասխը քնած չէ, արթուն է նաև Երևանը: Ու գիշերը այդպիսի գրառում է արել Հայաստանում Ֆրանսիայի դեսպան Ջոնաթան Լաքոթը, Հայաստանի ու Նախիջևանի սահմանին Երասխի հատվածում լարվածության կապակցությամբ, որի վերաբերյալ տեղեկություն էր տարածել Հայաստանի ՊՆ-ն: Լաքոթի գրառումը հուշում է, որ տեղի ունեցողը ամենևին լոկ միջադեպ չէ և կազմում է քաղաքական բավականին շոշափելի հանգույցի տարր: Արդեն մի քանի օր Ադրբեջանը փոխհրաձգություն է հրահրում այդ հատվածում, իսկ նախօրեին երեկոյից մինչև ուշ գիշեր եղել է բավականին լարված և հայկական դիրքերի ուղղությամբ կիրառվել է անգամ ականանետ: Ինչո՞ւ է Ադրբեջանը գնում այդ սրացմանն և ինչու Երասխի հատվածում:

Հայաստանում մեդիափորձագիտական շրջանակում փորձում են ստանալ այդ հարցի պատասխանը: Հատկանշական է, որ Բաքուն սրացման գնում է ռեգիոն ԵԽ նախագահ Շառլ Միշելի այցի ֆոնին, որում նա արեց Հայաստանի համար բավականին հետաքրքիր ու կարևոր հայտարարություններ, և Մոսկվա Ալիևի այցին ընդառաջ, որտեղ քննարկվելու է թե երկկողմ օրակարգ, թե արցախյան իրավիճակն ու եռակողմ՝ հայ-ռուս-ադրբեջանական ձևաչափով աշխատանքի ընթացքը, մասնավորապես հաղորդուղիների ապաշրջափակման առումով: Այդ համատեքստում, հարկ է ուշադրության արժանացնել մի հանգամանք:

Մոսկվա մեկնելուց առաջ Ալիևը հայտարարեց, որ հաղորդուղիները պետք է բացվեն բոլորը միաժամանակ: Սա բավականին ուշագրավ հայտարարություն է, եթե հաշվի առնենք այն, որ հարավային՝ Նախիջևան-Ադրբեջան ուղղությամբ հաղորդուղի գոյություն չունի և այն պետք է կառուցվի գրեթե զրոյից: Խոսքը Զանգելանով Մեղրի երկաթուղու մասին է: Այստեղ Հայաստանի հատվածում պետք է կառուցվի մոտ 40 կմ, իսկ Ադրբեջանի վերահսկողության տակ անցած հատվածում՝ մոտ 100 կմ երկաթգիծ: Դա տարիների հարց է, առնվազն մոտ երկու տարվա: Բաքուն ըստ ամենայնի փորձում է ժամանակ շահել, ձգելով եռակողմ ձևաչափի օրակարգը, որ ամրագրվել է հունվարի 11-ի մոսկովյան եռակողմ հայտարարությամբ: Չի բացառվում, որ Ալիևը Երասխում իրավիճակը լարում է մոսկովյան այցից առաջ, որտեղ Պուտինը նրա հետ քննարկելու է հաղորդուղիների ապաշրջափակման գործընթացը արագացնելու հարցը: Բանն այն է, որ առանց հարավային ուղղության այդ գործընթացի այսպես ասած գործնականացումը Ալիևի համար կարող է արժենալ այսպես կոչված «Զանգեզուրի միջանցքի» օրակարգի կորուստ: Բաքուն այդ օրակարգը չի կարող պահել, եթե տեղի ունենա ռեգիոնալ մնացյալ հաղորդուղիների ապաշրջափակում և հաղորդակցության վերականգնում:

Աղբյուրը՝ 1in.am