Սահմանադրական դատարանի նախագահի և նրա կնոջ ունեցվածքը

ArmDaily.am-ի «Հայտարարագիր» շարքում ներկայացվել է Սահմանադրական դատարանի նախագահ Արման Դիլանյանի հայտարարագիրը։

Ով է Արման Դիլանյանը

Ծնվել է 1974 թվականին Արարատի մարզի Գետափնյա գյուղում:

1996 թվականին ավարտել է ԵՊՀ իրավաբանական ֆակուլտետը:

2004 թվականին շնորհվել է իրավաբանական գիտությունների թեկնածուի գիտական կոչում՝ «Միջազգային հանրային իրավունք» մասնագիտացմամբ: Ատենախոսության թեման՝ «Միջազգային դատարանները և միջպետական վեճերի խաղաղ կարգավորման հիմնահարցերը»:

21.08.1996 թվականից աշխատել է ՀՀ սահմանադրական դատարանում` որպես աշխատակազմի քարտուղարության առաջին կարգի մասնագետ, ապա` նախագահի տեղակալի օգնական, իսկ այնուհետև` իրավախորհրդատվական ծառայության (վարչության) անհատական դիմումների վերլուծության բաժնի վարիչ:

29.09.2012 թվականից մինչև 26.04.2013 թվականը կատարել է ՀՀ սահմանադրական դատարանի աշխատակազմի իրավախորհրդատվական ծառայության (վարչության) պետի պարտականությունները:

03.04.2006 թվականից մինչ օրս դասավանդում է Հայ-Ռուսական (Սլավոնական) համալսարանում («Միջազգային իրավունք», «Միջազգային արդարադատություն» առարկաներ): Նույն թվականից մինչև 2013 թվականի փետրվար ամիսը հանդիսացել է Հայ-Ռուսական (Սլավոնական) համալսարանի իրավաբանական ֆակուլտետի Միջազգային և եվրոպական իրավունքի ամբիոնի վարիչը:

2013 թվականի դեկտեմբերի 12-ին ՀՀ Նախագահի հրամանագրով նշանակվել է ՀՀ վարչական դատարանի դատավոր:

2015 թվականից դասավանդում է ՀՀ Փաստաբանական դպրոցում («Ներկայացուցչությունը վարչական դատավարությունում», «Ներկայացուցչությունը վարչական վարույթում» առարկաներ):

2017 թվականի ապրիլի 28-ին ՀՀ դատավորների միության ընդհանուր ժողովի կողմից ընտրվել է ՀՀ դատավորների միության խորհրդի անդամ: Ընդգրկված է «Դատական իշխանություն» ամսագրի խմբագրական խորհրդի կազմում:

2018 թվականի սեպտեմբերի 13-ին Ազգային ժողովի կողմից ընտրվել է ՀՀ սահմանադրական դատարանի դատավոր:

2020 թվականի հոկտեմբերի 12-ին ՀՀ սահմանադրական դատարանի աշխատակարգային նիստի ընթացքում ընտրվել է ՍԴ նախագահ վեց տարի պաշտոնավարման ժամկետով:
Ամուսնացած է: Ունի երկու զավակ:

Ունեցվածքը

Դիլանյանը վերջին հայտարարագիրը ներկայացրել է 2021 թ-ի մայիսի 27-ին։ ՍԴ նախագահը հայտարարագրել է 2004 թ-ին ձեռք բերված` Վաղարշապատ քաղաքում գտնվող արտադրական նշանակության շինությունը, ինչպես նաև 2019 թ-ին ձեռք բերված Երևանի Նորք–Մարաշ թաղամասում գտնվող անհատական բնակելի տունը, որը նա 2020 թ-ին վաճառել է 88 մլն 200 հազար դրամով։ Տրանսպորտային միջոց, արժեթղթեր, թանկարժեք գույք նա չի հայտարարագրել։

Փոխարենը տարեվերջին հայտարարագրել է մի շարք փոխառություններ և ավանդներ։ Մասնավորապես, ավելի քան 10 մլն 917 հազար դրամի, ապա 43 մլն և ևս 1 մլն դրամի փոխառություն է տվել «2020 Արաբկիր» ՍՊԸ-ին, 44 մլն դրամի փոխառություն է տվել Ատոմ Հայրապետյանին, ով ի դեպ հանդիսանում է վերոհիշյալ բնակելի տան գնորդը։
Տարեվերջին հանձնած և վերադարձված ավանդների ընդհանուր գումարը կազմել է 14 մլն 527 հազար դրամ։

Տարեսկզբին բանկային հաշվի մնացորդը կազմել է 2 մլն 653 հազար դրամ, տարեվերջին արդեն հաշվին եղել է 1 մլն 880 հազար դրամ։

Տարվա ընթացքում նվազել են Դիլանյանի կանխիկ դրամական միջոցները։ Եթե տարեսկզբին նա հայտարարագրել էր 4 մլն 600 հազար դրամ, 45 000 դոլար և 38 հազար եվրո, ապա տարեվերջին այդ գումարն արդեն կազմում էր 4 մլն դրամ, 25 հազար դոլար, և 30 հազար եվրո։

Տարվա ընթացքում Դիլանյանը 9 աղբյուրից ֆինանսական եկամուտներ է ունեցել։ Մասնավորապես, ավելի քան 195 հազար դրամ՝ ԵՊՀ-ից, 10 մլն 643 հազար դրամ՝ Սահմանադրական դատարանից, ավելի քան 464 հազար 316 դրամ՝ Հայ-Ռուսական համալսարանից, 45 հազար 425 դրամ՝ ՀՀ Փաստաբանական դպրոց հիմնադրամից, 4 մլն 212 հազար դրամ՝ «Օղակ» ՍՀԿ-ի վարձակալությունից, 43 մլն դրամը՝ «Ինեկոբանկի» փոխառություններից ստացված եկամուտն է եղել, 88 մլն 200 հազար դրամը՝ գույքը օտարելուց ստացված եկամուտն է, 253 հազար 526 դրամը՝ «Ինեկոբանկից» ստացված այլ եկամուտն է եղել և 2 մլն 299 հազար դրամը ՀՀ ֆինանսների նախարարությունից ստացած այլ եկակուտներն են։

Դիլանյանի կինը հայտարարագրել է Երևանի Աջափնյակ համայնքում գտնվող բնակարան` բազմաբնակարան բնակելի շենքում։ Հանձնած և վերադարձված ավանդների գումարը տարեվերջին կազմել է 6,752։

Բանկային հաշվի մնացորդը տարեսկզբին կազմել է 42 հազար դրամ և 19 հազար 330 դոլար, տարեվերջին արդեն այս գումարը կազմել է 5 հազար դրամ և 86,31 դոլար։
Տարվա ընթացքում Դիլանյանի կնոջ եկամուտները կազմել են 54 հազար դրամ ՀՀ աշխատանքի և սոցիալական հարցերի նախարարությունից և 271.48 դոլար՝ ԱԿԲԱ բանկից։