Օրական մինչև 1000 հոգի. թալիբներից փախչող աֆղանստանցիները հատում են Թուրքիայի սահմանը
Ամեն օր մինչև 1000 աֆղանստանցի անօրինական ճանապարհով հատում է Թուրքիայի արևելյան սահմանները՝ խուսափելու Աֆղանստանում թալիբների աճող վերահսկողությունից, հայտնում է Ahval թերթը։
Սահմանային իշխանությունների տվյալներով՝ Թուրքիայի տարածք հասնող անձանց մեծ մասը 16-ից 25 տարեկան երիտասարդներ են, որոնք ճանապարհի մեծ մասն անցնում են ոտքով։
Պաշտոնական տվյալների համաձայն՝ միայն 2020 թվականի ընթացքում ավելի քան 500 հազար ապաստան հայցողներ, որոնց մեծ մասը՝ Աֆղանստանից, Վանի նահանգի սահմանով ապօրինի մուտք են գործել Թուրքիա։ Ապօրինի Թուրքիա անցնող աֆղանստանցիները, բռնվելու դեպքում, պահվում են Էրզրումում և հարևան նահանգներում ներգաղթյալների համար նախատեսված կենտրոններում, ապա՝ արտաքսվում։
Թուրքիայի ներգաղթի և ապաստանի տրամադրման օրենքների համաձայն՝ միայն եվրոպական երկրների քաղաքացիները կարող են փախստականի կարգավիճակ ստանալ, իսկ մյուս ազգությունների ներկայացուցիչները կարող են ժամանակավոր պաշտպանություն խնդրել ՄԱԿ-ի փախստականների հարցերով գերագույն հանձնակատարից:
Լրատվականը նշել է, որ աֆղանստանցիների կողմից Թուրքիայի սահմանը հատելը պայմանավորված է «Թալիբան» շարժման գործողություններով, որը վերջին օրերի ընթացքում վերահսկողություն է սահմանել երկրի զգալի տարածքներում։ Նրանց մի մասը ցանկանում է օրինական ճանապարհով հասնել Թուրքիա՝ դիմելով կրթական, բժշկական կամ տուրիստական այցագրի համար, ինչպես նաև «ոսկե այցագրի» համար, սակայն նրանցից քչերի դիմումներն են բավարարվում։
Հիշեցնենք, որ Աֆղանստանում այժմ պայքար է ընթանում կառավարական ուժերի և «Թալիբան» շարժման միջև, որոնք զգալի տարածքներ են գրավել գյուղական բնակավայրերում և հարձակումներ են սկսել մեծ քաղաքների դեմ: Սրացումը տեղի է ունենում ամերիկյան զորքերի դուրսբերման ֆոնին, որը ՌԴ արտգործնախարար Սերգեյ Լավրովն անվանել է Աֆղանստանում ԱՄՆ առաքելության ձախողման ընդունում:
Աֆղանստանի որոշ զինվորականներ անցնում են Տաջիկստանի տարածք: Դուշանբեն ՀԱՊԿ դաշնակիցներին խնդրել է օգնել ամրապնդել հարավային սահմանները:
Հիշեցնենք նաև, որ Թուրքիան Միացյալ Նահանգների հետ պայմանավորվածություն է ձեռք բերել Քաբուլի օդանավակայանի վերահսկողությունը ստանձնելու հարցում։ Թուրքիան Աֆղանստանում ներկայում ունի 500 զինվոր, որոնց թիվը չի պատրաստվում ավելացնել։