Իրանի աջակցությունը վայելող խմբավորումների դեմ ԱՄՆ-ի գործողությունները Վիեննայի բանակցություններում նոր զիջումներ կորզելու նպատակ ունեն

Իրանական Tehran Times թերթն անդրադարձել է Վիեննայում ընթացող Իրանի միջուկային բանակցությունների վերջին փուլին ընդառաջ Միացյալ Նահանգների գործողություններին և նշել, որ ԱՄՆ-ն մի շարք նպատակային միջոցներ է ձեռնարկել՝ Իրանի կողմից ավելի շատ զիջումների հասնելու նպատակով, որոնց շուրջ բանակցային կողմերն առայժմ համաձայնության գալ չեն կարողացել։

Վիեննայի միջուկային բանակցությունների վեցերորդ փուլը, որն ուղղված էր Գործողությունների համատեղ համապարփակ ծրագրի (JCPOA) վերականգնմանը, ավարտվել է ավելի քան մեկ շաբաթ առաջ, սակայն որոշ առանցքային խնդիրներ դեռևս չեն լուծվել։ Իրանի գլխավոր բանակցող Սեյյեդ Աբբաս Արաղչին նշել է, որ պետք է «լուրջ որոշումներ» ընդունվեն՝ գործարքի շուրջ Իրանի և ԱՄՆ-ի պատրաստակամությունը վերականգնելու համար։ Նա նշել է, որ այս ուղղությամբ լուրջ որոշումները պետք է ընդունվեն բանակցության կողմ հանդիսացող պետություններում` բանակցությունների կողմերին կոչ անելով Իրանի միջուկային համաձայնագրի վերականգնման նպատակով լրջորեն, իրատեսորեն և վճռականորեն ընդունել անհրաժեշտ նախաձեռնությունները։

Արաղչիի կարծիքով` բանակցությունների 7-րդ փուլը բավական բարդ կլինի, քանի որ այն հնարավոր կլինի իրականացնել միայն այն դեպքում, երբ բոլոր կողմերը որոշում կայացնեն հրաժարվել իրենց նախնական պահանջներից։

«Սակայն որո՞նք են այդ պահանջները։ Եվ ինչպե՞ս են դրանք ազդում տարածաշրջանում Իրանի Իսլամական Հանրապետության և Միացյալ Նահանգների միջև հարաբերությունների վրա», - գրված է թերթի անդրադարձում՝ ստորև անդրադառնալով վերոնշյալ պահանջներին։

Ինչ վերաբերում է իրանական կողմի պահանջներին՝ Իրանը ցանկանում է, որ ԱՄՆ-ի նախկին նախագահ Դոնալդ Թրամփի կողմից սահմանված պատժամիջոցները վերացվեն, քանի որ այդպիսով Իրանի միջուկային համաձայնագրին վերադառնալն անհնար կլինի։ ԱՄՆ-ի գործող նախագահ Ջո Բայդենի վարչակազմը, իր հերթին, պահանջել է Իրանից՝ ստանձնել բանակցությունները ամրապնդելու և ընդլայնելու պարտավորությունը, ինչը Իրանը մերժել է՝ նշելով, որ շահագրգռված է միայն 2015 թվականին ընդունված համաձայնագրի վերականգնմամբ։

Tehran Times-ը նշում է, որ կարծես հենց այս պահանջներին հասնելու նպատակով էլ Միացյալ Նահանգները դիմում է նախկին վարչակազմի քաղաքականությանը, ինչը ներառում է տարածաշրջանային մոբիլիզացիա և թիրախավորված հարվածներ «Իրանի աջակցությունը վայելող» խմբավորումների ուղղությամբ։ Հենց այս շրջանակում էլ Միացյալ Նահանգները հարվածներ էր հասցրել սիրիա-իրաքյան սահմանի տարածքում։ Իր քայլը Պենտագոնը արդարացրել է Իրանի աջակցությունը վայելող խմբավորումների կողմից Իրաքում գտնվող ամերիկյան հաստատությունների վրա անօդաչու թռչող սարքերի միջոցով իրականացվող հարձակումներով։

Թերթը նշում է, որ Իրանի Իսլամական Հանրապետության դեմ ԱՄՆ-ի քայլերը կարող են մեկնաբանվել որպես տարածաշրջանում Իրանի ազդեցության դեմ Վաշինգտոնի շարունակվող պայքարի դրսևորում՝ հակառակ Իրանի միջուկային համաձայնագրի վերականգնման շուրջ բանակցություններին։ Սա նշանակում է, որ տարածաշրջանային խնդիրները չլուծելու դեպքում լարվածությունը շարունակաբար կբարձրանա, նույնիսկ միջուկային համաձայնագրի նախնական ձևաչափով վերականգնման դեպքում։ Հենց այս նպատակով էլ Միացյալ Նահանգներն Իրանին ստիպելու է նույնիսկ Իրանի միջուկային համաձայնագրի վերականգնումից հետո քննարկուները շարունակելու պարտավորություններ ստանձնել։