Ահմադինեժադը հայտնել է, որ միջուկային զենքը չի կարող կանխել ԱՄՆ-ի՝ որպես համաշխարհային գերտերության կործանումը
Իրանի նախկին նախագահ Մահմուդ Ահմադինեժադը Lenta.ru-ին տված հարցազրույցում հայտնել է, որ միջուկային զենքը չի կարող կանխել ԱՄՆ-ի՝ որպես համաշխարհային գերտերության կործանումը։
«Կարո՞ղ են արդյոք ամերիկյան ատոմային ռումբերը կանգնեցնել ԱՄՆ-ի՝ որպես համաշխարհային գերտերության անկումը։ Չեմ կարծում, որ աշխարհում կգտնվի գեթ մեկ իմաստուն մարդ, որը դրան դրական պատասխան կտա»,- ասել է Իրանի նախկին նախագահը։
Նա պատմել է, որ 2005 թվականին Ռուսաստանի նախագահ Վլադիմիր Պուտինի հետ առաջին հանդիպման ժամանակ զրուցել են այն մասին, թե արդյոք միջուկային զենքը կարող էր կանխել ԽՍՀՄ-ի փլուզումը:
«Ճիշտ է, ԽՍՀՄ-ն զարգացած էր, բայց դա չկանխեց նրա փլուզումը։ Քանի որ զենքը սկզբունքորեն չի կարող բարելավել մարդկային հարաբերությունները: Այսօր համաշխարհային կապիտալիստական համակարգը, որը ղեկավարում է Ամերիկան, անկում է ապրում»,- հայտնել է քաղաքական գործիչը։
Մահմուդ Ահմադինեժադը նաև հավելել է, որ միջուկային զենքից «ոչ մի օգուտ չկա», ուստի դրա արտադրության բոլոր ծախսերն ավելորդ են: Նա զենքի արտադրությունն ու կուտակումն անվանել է «անմարդկային գործունեություն»։