McAfee ընկերության հիմնադիր Ջոն Մաքաֆիին մահացած են գտել Իսպանիայի բանտում. ժամեր առաջ նրան ԱՄՆ արտահանձնելու որոշում էր կայացվել
Հակավիրուսային ծրագրային ապահովում մշակող McAfee ընկերության հիմնադիր, ամերիկա-բրիտանացի ծրագրավորող և գործարար Ջոն Մաքաֆիին մահացած են գտել Բարսելոնայի բանտում, հայտնում է BBC լրատվականը և հավելում, որ դեպքից ժամեր առաջ դատարանը նրան Միացյալ Նահանգներ արտահանձնելու որոշում էր կայացրել։
Բանտի բուժաշխատողները փորձել են վերակենդանացնել գործարարին, սակայն չի հաջողվել։
Մաքաֆին Միացյալ Նահանգների պահանջով ձերբակալվել էր անցյալ տարի Իսպանիայում, երբ պատրաստվում էր ինքնաթիռ նստել, նա մեղադրվում էր 4 տարի շարունակ հարկային հայտարարագրեր չներկայացնելու համար։
Գործարարին մահացած հայտնաբերելուց հետո փաստաբանն ասել է, որ նա իսկական մարտիկ էր և պատրաստվում էր մինչև վերջ պայքարել և որ նրա մահն ԱՄՆ-ի կառավարության գործն է, որը փորձում էր վերացնել գործարարին։
Մաքաֆիին սպառնում էր 30 տարվա ազատազրկում։ Նա պնդում էր, որ իր նկատմամբ առաջադրված մեղադրանքները քաղաքական բնույթ են կրում և կապված են Միացյալ Նահանգների հարկային մարմիններում կոռուպցիայի առկայության դեմ հանդես գալու հետ։
Գործարարը 1987 թվականին հիմնադրել է հակավիրուսային ծրագրակազմ մշակող McAfee ընկերությունը, որը 2011 թվականին ձեռք է բերվել Intel Corporation-ի կողմից՝ ավելի քան 7,6 միլիարդ դոլարով: