Քանի որ Ուկրաինան մեզ համար փակել է օդային ճանապարհը, ապա մենք պարզապես չենք ընդունի Ուկրաինայից եկող ինքնաթիռները․ Լուկաշենկո

Բելառուսի նախագահ Ալեքսանդր Լուկաշենկոն հայտնել է, որ Ուկրաինայից ինքնաթիռներ չեն ընդունելու, հայտնում է korrespondent.net-ը։

«Դուք տեսնում եք, թե Ուկրաինայի քայլն ինչ զզվելի է ․․․ մենք պետք է շրջանցենք ճանապարհը դեպի Թուրքիա, ապա Եգիպտոս և այլն՝ այն երկարեցելով 40-45 րոպե։ Քանի որ Ուկրաինան մեզ համար փակել է օդային ճանապարհը, ապա մենք պարզապես չենք ընդունի Ուկրաինայից եկող ինքնաթիռները», - ասել է Լուկաշենկոն և հավելել, որ, իր կարծիքով, «Բելավիա» ավիաընկերության համար պետք է հավասար պայմաններ ստեղծվեն։

Լրատվականը նշել է, որ Ուկրաինան մայիսի 26-ին դադարեցրել էր Բելառուսի հետ թռիչքները, որից 3 օր անց բելառուսական ինքնաթիռներին արգելվել էր օգտագործել Ուկրաինայի օդային տարածքը։

Հիշեցնենք, որ Ryanair ավիաընկերության ինքնաթիռը, որը թռչելիս է եղել Աթենք-Վիլնյուս երթուղով, Բելառուսի տարածքի մեծ մասի վրայով անցնելուց և Լիտվայի հետ սահմանին մոտենալուց հետո փոխել է ընթացքը և շարժվել Մինսկի ուղղությամբ: Մինսկի օդանավակայանից հայտնել էին, որ օդաչուների փոխանցմամբ՝ օդանավն «ականապատված» է եղել, սակայն ստուգումների ընթացքում այդ տեղեկությունը հերքվել է: Բելառուսական աղբյուրները հայտնել էին, որ երկրի նախագահ Ալեքսանդր Լուկաշենկոն անձամբ է հրաման տվել Մինսկում ընդունել Ryanair ավիաընկերության ինքնաթիռը:

Ինքնաթիռի վայրէջքից հետո օդանավակայանում ձերբակալվել է Բելառուսում ծայրահեղական ճանաչված «NEXTA» թելեգրամյան ալիքի նախկին գլխավոր խմբագիր Ռոման Պրոտասևիչը, որի նկատմամբ, «ՌԻԱ Նովոստի»-ի փոխանցմամբ, հարուցվել է քրեական գործ մի քանի հոդվածով և կարող է սահմանվել մինչև 15 տարվա ազատազրկում։