Եթե որևէ լրագրողի հետո որևէ բան պատահեց, ապա սա լինելու է ձեր անգործության հետևանքով. Անի Գևորգյանը՝ իրավապահներին և ոստիկանապետին (տեսանյութ)
Ողջ քարոզարշավի ընթացքը մեզ համար լուսաբանելը շատ բարդ է, քանի որ վարչապետի ժամանակավոր պաշտոնակատարին, ՔՊ-ի վարչապետի թեկնածուին պարբերաբար ուղեկցում են հարյուրավոր ոստիկաններ, անհնար է գրեթե մոտենալը, մասնավորապես՝ առաջին շարքերին, չեմ խոսում Նիկոլ Փաշինյանի մասին: Այս մասին այսօր ասուլիսի ընթացքում ասաց Tert.am-ի լրագրող Անի Գևորգյանը:
«Հիմա ուղեկցում են նաև քաղաքացիական հագուստով ոստիկաններ, որոնք դրսևորում են ագրեսիվ պահվածք և ամեն կերպ փորձում են այնպես անել, որ մենք չնկարենք այն, ինչ իրենց ձեռնտու չէ, հայտարարություններից, քաղաքացիների իրական ընդունելությունից սկսած»,- ասաց Անի Գևորգյանը:
Նա նշեց՝ ստեղծվել է ներքին համոզմունք, որ քաղաքացիներին տարբեր մարզերում ուղղորդել են, որպեսզի թիրախավորեն մի քանի լրագրողների:
«Ներքին համոզմունք է ստեղծվում, որ պատահական չէ, երբ մեզ Արտաշատում թիրախավորում են, Նաիրի Սարգսյանը այնտեղ կանգնած է լինում: Ինձ մոտ համոզմունք է, որ սա պատահական չէ և քաղաքացիներին ամենևին էլ պետք չէ, որ ինձ այդ պահին քաշքշեն, խոչընդոտեն իմ ազատ տեղաշարժը, վիրավորեն, այդ իսկ պատճառով ինձ մոտ տպավորություն է ձևավորվում, որ այս ամենը կոնկրետ ուղղորդված է»,- նշեց նա:
Լրագրողը ընդգծեց՝ Սյունիքի քարոզարշավի ժամանակ լրագրողներով արձանագրել են, որ խոչընդոտվում է ոչ միայն քաղաքացիների, լրագրողների տեղաշարժը, այլ նաև ՊՆ հաշվեկշռում գտնվող մոտ 6-8 մեքենաների երթևեկություն:
«Քարոզարշավային այդ իմքայլական միջավայրից դուրս ես չեմ տեսել իմ նկատմամբ այդպիսի վերաբերմունք, այդպիսի ագրեսիա, թե՛ կանանց, թե՛ տղամարդկանց խմբերի կողմից, այն խմբերի, որոնք ամենուր ուղեկցում են Նիկոլ Փաշինյանին և նրա թիմակիցներին, և դա է պատճառը, որ ձևավորվել է ինձ մոտ համոզմունք, որ այս ամենը ուղղորդված է»,- նշեց նա:
Անի Գևորգյանը նշեց, թե ինչով է տարբերվում այս քարոզարշավը նախորդներից և ընդգծեց՝ լրագրողների ֆիզիկական անվտանգության ապահովումը պետք է լինի լրագրողական համայնքի ուշադրության կենտրոնում:
«Այս քարոզարշավում աննախադեպ ձևով թիրախավորվում են լրագրողները և անթաքույց ատելության արշավ է, Նիկոլ Փաշինյանը լրագրողներին «քիլլեր» է անվանել: Ես երբեք չէի մտածի, որ այս նախադասությունը կասեմ, բայց սա այն դեպքն է, երբ ինձ մոտ առաջացել են վախեր իմ ֆիզիկական անվտանգության հետ կապված, քանի որ այդ մարդիկ անթաքույց ագրեսիվ հատվածին լարում են իմ դեմ և ես ինձ այլևս ապահով չեմ զգում»,- ասաց Անի Գևորգյանը:
Անի Գևորգյանը դիմեց նաև իրավապահներին, ոստիկանապետին: «Եթե որևէ լրագրողի հետո որևէ բան պատահեց, ապա սա լինելու է ձեր անգործության հետևանքով»,-եզրափակեց նա: