Սաուդյան Արաբիայում երիտասարդին մահապատժի են ենթարկել 17 տարեկանում «կատարած» հանցանքների համար՝ չնայած մահապատժի վերացմանը
Սաուդյան Արաբիայում 26-ամյա տղամարդուն մահապատժի են ենթարկել 17 տարեկանում կատարած հանցանքների համար՝ հակառակ այն բանի, որ թագավորությունը հայտարարել էր անչափահասների նկատմամբ մահապատժի վերացման մասին, հայտնում է BBC լրատվականը։
Մուստաֆա Հաշեմ ալ Դարուիշը, որը մահապատժի է ենթարկվել նավթով հարուստ Արևելյան նահանգի Դամմամ քաղաքում, ձերբակալվել է 2015 թվականին՝ ահաբեկչական բջիջ ստեղծելու և զինված ապստամբություն իրականացնելու փորձ կատարելու մեղադրանքով։
Իրավապաշտպան կազմակերպությունները կոչ են արել չեղարկել մահապատիժը։ Amnesty International-ը և Reprieve-ը նշել են, որ Դարուիշն արդեն իսկ հրաժարվել էր իր խոստովանությունից՝ նշելով, որ այն կատարվել է խոշտանգումներից հետո։
Reuters լրատվական գործակալության փոխանցմամբ՝ դատական փաստաթղթերում իրավախախտումների վերաբերյալ ամսաթվերը նշված չեն։
Հաշեմ ալ Դարուիշի ընտանիքը մահապատժի մասին տեղեկացվել է առցանց և նախապես չի զգուշացվել։ Ընտանիքի անդամները նշել են, որ նրա ձերբակալությունից ի վեր ցավից բացի ոչինչ չեն տեսել, և նշել, որ դա մահ է եղել ամբողջ ընտանիքի համար։