Փաշինյանը եղել է ՀՀ մամուլի առաջին, և, գուցե, ամենապահանջված լրատվական «քիլլերը», որն ունեցել է հարյուրավոր զոհեր, ում օգտագործել են գրեթե բոլորը՝ իրենց խնդիրների լուծման ճանապարհին․ Ս․ Սեյրանյան

Այն բոլոր երևույթները, որոնց մասին Նիկոլ Փաշինյանը խոսում է, իր պատկերացումներն են, իր աշխարհընկալումներն են, նա խոսում է ինքն իր մասին, սա է ամբողջ աբսուրդը։ Այս մասին Tert.am-ի հետ զրույցում ասաց Հայաստանի ժուռնալիստների միության նախագահ Սաթիկ Սեյրանյանը՝ անդրադառնալով Նիկոլ Փաշինյանի այն հայտարարությանը, թե այսօր լրատվական դաշտում գործում են մարդիկ, որոնք ավելի շատ «քիլլերի» են նման, քան լրագրողի։

«Այդպիսի հայտարարություն անում է մի մարդ, որն անընդհատ խոսում է ժողովրդի անունից, ասում է՝ սիրում է, հպարտանում է, բայց, ինչպես տեսնում ենք, ամբողջ բյուջեի միջոցները, վարչական լծակները, ուժային կառույցները լծված են՝ ապահովելու նրա անվտանգությունը նույն այդ ժողովրդից։ Նա քարոզարշավներին գնում է ոչ միայն ողջ այդ ռեսուրսն օգտագործելով, ոստիկանական հսկայաքանակ աշխատակիցների, ԱԱԾ աշխատակիցների, կարմիր բերետավորների ուղեկցությամբ, այլև, որ ամենակարևորն է, դիպուկահարների ուղեկցությամբ։ Չի եղել մի մարզային այց, որին դիպուկահարներ չլինեն»,-ասաց Սեյրանյանը։

Ըստ Ժուռնալիստների միության նախագահի՝ մամուլի մասին Փաշինյանը դատում է այն կաղապարներով, որոնցով ժամանակին ինքն է առաջնորդվել և՛ որպես լրագրող, և՛ որպես խմբագիր։

«Այո՛, մեր լրատվական դաշտն ունի բազմաթիվ խնդիրներ, արատավոր դրսևորումներ, բայց եթե ամեն ինչ իսկապես այնպիսին է, ինչպես ինքն է նկարագրում, ապա դրանում ամենամեծ ներդրումն ունեցողը, եթե ոչ գլխավորը, հենց Նիկոլ Փաշինյանն է, որն իր ամբողջ լրագրողական կարիերան, խմբագրական աշխատանքը կառուցել է հենց իր ասած «քիլլերության» սկզբունքով՝ թիրախավորելով առանձին գործիչների, առանձին տնտեսվարողների, և լռելու դիմաց ինչ-որ բաներ պահանջելով։ Ժամանակին նույնիսկ անեկդոտներ էին պատմում իր մասին, նա եղել է ՀՀ մամուլի առաջին, և, գուցե, տարբեր ժամանակներում ամենապահանջված լրատվական «քիլլերը», որն ունեցել է հարյուրավոր զոհեր, ում օգտագործել են գրեթե բոլորը՝ իրենց խնդիրների լուծման ճանապարհին»,-ասաց Սեյրանյանը։

Նրա խոսքով՝ Փաշինյանը, «նախկինների» մասին խոսելով մամուլի վերաբերյալ դատողություն անելիս, պարտավոր է հիշել, որ այս լրատվական դաշտի ամենակարկառուն «նախկինը» հենց ինքն է, և բոլոր արատավոր երևույթները, Սեյրանյանի խոսքով, նրա մեջ են մարմնավորված։

«Նիկոլ Փաշինյանը խոսում է մի բանից, որի ոչ պատվաբեր դափնին իրեն է պատկանում։ Ինչպիսի լրագրող եղել է՝ մանիպուլյացիաներ, աճպարարություն, մարդկանց մոլորեցնող, անպատասխանատու հայտարարություններ անող, ստեր տարածող, նույնպիսի էլ վարչապետ է, պարզապես այս դեպքում ծանր ենք վճարում բոլորս և պետության կորստի վտանգի առաջ ենք կանգնում»,-ասաց նա։

Սեյրանյանը նաև ընդգծեց՝ երբ խոսվում է լրագրողական էթիկայի մասին, չպետք է մոռանալ քաղաքական գործիչների վարվեցողության կանոնների մասին։ «Այսօր Նիկոլ Փաշինյանի պատգամավորական կազմում կան անձինք, որոնք իրենց գռեհիկ պահվածքով առանձնապես չեն տարբերվում իրենց լիդերի պահվածքից։ Զավեշտալի է, երբ իրենք խոսում են էթիկայի կանոններից։ Մի մարդ է լրատվական դաշտն աղբավայր անվանում, որ դրա կարկառուն ներկայացուցիչն ու հիմնադիրն է եղել»,-ասաց նա։

Վերջինս նաև կարևորեց՝ Փաշինյանը երկիրը հասցրել է ծանր վիճակի, խեղել է բազմաթիվ ճակատագրեր, կործանել է բազմաթիվ ընտանքիներ, Եռաբլուրն օրեցօր ավելանում է, ՊՆ-ն մինչև հիմա ո՛չ զոհերի, ո՛չ գերիների, ո՛չ անհետ կորածների թիվ չի հրապարակել, ու լրագրողներն են զբաղված բացահայտումներ կատարելով։

«Այս ամբողջ մեղքը թողած՝ հիմա ինքն ինչ-որ մեղավորնե՞ր է փնտրում, թիրախավորում է լրագրողներին, որ բացահայտում են իրենց կոռուպցիոն դրվագները, ստերն են մատնացույց անում, հանցագործություններն են մատնացույց անում։ Նա հայելային կերպով նկարագրում է իրեն»,-ասաց նա։