Պորոշենկոն «տականքություն» է որակել Զելենսկիի` Դոնբասից գերիներին վերադարձնելու անկարողությունը

Ուկրաինայի նախկին նախագահ և Գերագույն ռադայի պատգամավոր Պյոտր Պորոշենկոն քննադատել է իր իրավահաջորդ Վլադիմիր Զելենսկիին` Ուկրաինայի գերեվարված քաղաքացիներին հայրենիք վերադարձնելու հարցում անկարող լինելու համար, և այդ վարքն անվանել է «տականքություն»: Այս մասին հաղորդագրություն է հայտնվել «Եվրոպական համերաշխություն» կուսակցության կայքում, գրում է lenta.ru կայքը:

Քաղաքական գործչի խոսքերով՝ 2020 թվականի ապրիլից ի վեր ոչ մի գերի չի վերադարձել կառավարության վերահսկողության տակ գտնվող տարածք, մինչդեռ նրա կառավարման տարիներին (2014-2019) վերադարձել է գրեթե 3300 գերի:

«Ավելին, այսօր դուք չեք լսի, որ իշխանությունները հոգ են տանում քաղբանտարկյալների և գերիների մասին, հոգ են տանում նրանց ճակատագրերի մասին»,-ասել է Պորոշենկոն:

Նա բացատրել է, որ երկրի արևելքում հակամարտության սկզբում գերիների փոխանակմամբ զբաղվում էր Ուկրաինայի անվտանգության ծառայությունը, ապա, երբ գերիների հարցերը սկսեցին լուծվել միջազգային հարթակներում, քաղաքական գործիչը գործը վստահել է «Ընդդիմադիր հարթակ հանուն կյանքի» կուսակցության ղեկավար Վիկտոր Մեդվեդչուկին:

«Եվ ես համաձայնել եմ դրան: Քանի որ ես պատրաստ եմ, ուզում եմ կրկնել, անգամ ճաղատ սատանայի հետ խոսել, որպեսզի մարդկանց տուն վերադարձնեմ»,-ասել է նախկին նախագահը:

Պատգամավորը նշել է, որ ներկայիս կառավարությունը պարզապես օգտագործում է գերիների հարցը երկրի ներսում քաղաքական պայքարի և ընդդիմախոսներին վարկաբեկելու համար: «Կարծում եմ՝ դուք անցել եք կարմիր գիծը: Այդպես անել չի կարելի»,-ընդգծել է խորհրդարանականը: