«Պատիվ ունեմ». թող փորձեն ուժ կիրառել կամ սպառնալ որեւէ մեկին
Մենք թույլ չենք տա վենդետա իրականացնել: Այս մասին հունիսի 10-ին հայտարարել է «Պատիվ ունեմ» դաշինքի վարչապետի թեկնածու Արթուր Վանեցյանը:
Նա ցավով նշել է, որ այսօր նման սպառնալիքներ հնչեցնողը ներկայացնում է Հայաստանը եւ վարչապետի ժամանակավոր պաշտոնակատարն է: «Սպառնալիքները, որոնք նա հնչեցնում է ... Սա ուղղակի անընդունելի է: Ի՞նչ է նշանակում՝ գլուխները կպոկենք, ատամները կջարդնեք եւ այլն: Նրանք միայն գլուխները կխփեն պատին եւ ոչինչ ավելի: Ո՞վ եք դուք, որ երկրի ներսում սպառնում եք Հայաստանի քաղաքացիներին:
Եթե այդքան ուժեղ եք, պատասխանեք Ալիեւին, պատասխանեք թուրքերին: Երբ թուրքերը ներխուժում են մեր տարածք, ծեծում մեր զինվորին, ինչու՞ չեք պատասխանում: Երբ Ալիեւը Հայաստանի, հայ ժողովրդի, կապիտուլյատորի հասցեին ամենաստոր հայտարարություններն է անում, նա ինչու՞ չի պատասխանում: Մենք ենք ստիպված պատասխանել ադրբեջանցիներին: Իսկ հիմա նա ասում է, որ պատրաստվում է վենդետա իրականացնել:
Թող ինչ-որ մեկը փորձի ուժ կիրառել կամ սպառնալ մեր համախոհներին ու, առհասարակ, Հայաստանի ցանկացած քաղաքացու: Վստահեցնում եմ ձեզ, որ դա նրանց համար ոչ մի լավ հետեւանքի չի հանգեցնի», - նշել է Վանեցյանը: