Կարևոր է, որ կուսակցություններն ունենան հակաճգնաժամային կարգավորման հստակ տեսլական. Լիլիա Ամիրխանյան (տեսանյութ)

Նախընտրական ծրագրով հակաճգնաժամային միջոցառումներին առանձին անդրադարձով հանդես են եկել «Հայաստան» դաշինքն ու «Պատիվ ունեմ» դաշինքը. Հաշվի առնելով այն իրավիճակը, որում այսօր հայտնվել է մեր տնտեսությունը՝ շատ կարևոր է, թե որ կուսակցություններն ունեն հակաճգնաժամային կարգավորմանը հստակ անդրադարձ: Նշված ուժերն ունեն: Այս մասին «Առավոտյան լուրեր Լիլիթ Թումանյանի հետ» հաղորդման «Հայացք. տնտեսություն» հատվածում ասել է «Հայացք» վերլուծական կենտրոնի փորձագետ Լիլիա Ամիրխանյանն՝ անդրադառնալով «Գելափ»-ի կողմից իրականացրած վերջին հարցման արդյունքներով առաջատար չորս կուսակցությունների նախընտրական ծրագրերին:

Հարցման արդյունքներով առաջատարը չորսն են՝ «Հայաստան» դաշինքը, «Պատիվ ունեմ» դաշինքը, «Քաղաքացիական պայմանագիր» կուսակցությունը, «Բարգավաճ Հայաստան» կուսակցությունը:

«Հասկանալի է, որ տարբեր պատճառներով հնարավոր են թերահավատ մոտեցում հարցումն իրականացնող ընկերության արդյունքների նկատմամբ, բայց այս պահին ունենք սա: Կունենանք այլ հարցումներ կամ հետագա հարցումներով այլ ֆավորիտներ, կանդրադառնանք նաև այլ կուսակցություններին»,- նշել է Լ.Ամիրխանյանը և հավելել. «Իրենց նախընտրական ծրագրում, որպես հակաճգնաժամային առանձին դրույթ ԲՀԿ-ն և ՔՊ-ն չունեն: Վերջինիս մոտ շեշտադրումներն ավելի շատ հետճգնաժամային կարգավորման ուղղությամբ են: Ըստ էության, պահպանվում է նույն ձեռագիրը. ճգնաժամը ՔՊ-ի գնահատմամբ արդեն անցյալում է, գործ ունենք արդեն հետճգնաժամային իրավիճակի հետ: Ինչ վերաբերում է ԲՀԿ-ի ծրագրին, ապա տարբեր կետերում, կուսակցության կողմից կան անդրադարձներ ճգնաժամային խնդիրների մասին, բայց հակաճգնաժամային կարգավորման ամբողջական մեխանիզմ՝ ոչ»:

Ըստ փորձագետի՝ որպես հակաճգնաժամային կարգավորման տեսլական բավական հստակ արձանագրում կա «Պատիվ ունեմ» դաշինքի ծրագրում. «Դաշինքն այս համատեքստում առաջարկում է հարկաբյուջետային կայունության մեխանիզմի ստեղծում, դրա համատեքստում պետական պարտքի կառավարելիության շեշտադրմամբ»: Փորձագետի կարծիքով՝ կարևոր է հարկաբյուջետային կայունության ապահովումը կայուն տնտեսական միջավայրի ստեղծման համար, առանց որի հնարավոր չէ պատկերացնել տնտեսության զարգացման այլ ուղղությունները:

«Բոլոր կուսակցությունների ծրագրում կա անդրադարձ գյուղատնտեսությանը: ՔՊ-ի մոտ գյուղատնտեսության բաժնում, ինչպես նաև մյուս բոլոր բաժիններում, տարանջատված է՝ ինչ են արել և ինչ են նախանշում սկզբունքով: Հետաքրքիր է, որ ինչ են արել բաժնում արձանագրված չէ, որ փակել են գյուղատնտեսության նախարարությունը, իսկ այն, ինչ ներկայացված է, կրկին իրենց որդեգրած ձեռագրի համար, տպավորություն է ստեղծվում, որ գործ ունենք բուռն զարգացող գյուղատնտեսության հետ: Այնինչ իրականում ունենք այն, ինչ ունենք»,- ասել է փորձագետը:

«Գյուղատնտեսության տեսլականով առանձնահատուկ մոտեցում ունի «Հայաստան» դաշինքը՝ ԵԱՏՄ ներուժով ոլորտը զարգացնելու իր մոտեցմամբ, «Պատիվ ունեմ» դաշինքը՝ բացի արտահանող գյուղարտադրանքից, նաև բնատնտեսություն հիմնելու մոտեցումով»,- նշել է Ամիրխանյանը: Փորձագետի խոսքով՝ ԲՀԿ-ն նախընտրական ծրագրով ամրագրում է գյուղատնտեսության նախարարությունը վերաբացելու խնդիրը, ինչպես նաև գյուղատնտեսական վարկերի պարտավորությունների չեղարկումը, արտոնյալ վարկերի տրամադրումը:

Հաղորդմանն անդրադարձ եղավ նաև նշված կուսակցությունների ծրագրերում ներդրումների ներգրավման մոտեցումներին: «Քաղաքացիական պայմանագիրը, ինչպես և վերջին երեք տարիներին է հայտարարում, բայց չենք տեսնում, նախընտրական ծրագրով ևս առաջարկում է ներդրումների աճ՝ նախանշելով ներդրումներ-ՀՆԱ հարաբերակցության նվազագույն 25%-ի շեմ: ԲՀԿ-ն ներդրումների համար ծրագրել է ՀՆԱ-ներդրումներ հարաբերակցության 40%-ի շեմ»:

«Առանձնահատկություններ ունեն «Հայաստան» և «Պատիվ ունեմ» դաշինքների ծրագրերը: «Հայաստան» դաշինքը նախատեսում է ներդրումային նոր օրենք երաշխիքների ապահովման մասին: «Պատիվ ունեմ» դաշինքը՝ ներդրումների ներգրավման հարցում կարևորում է բանկային գաղտնիքի շեշտադրումը, կապիտալի ներկրման ազատականացումը»,- ասել է Ամիրխանյանը:

Մանրամասները՝ տեսանյութում: