Մեքսիկայում 34-ամյա տղամարդու մոտ կորոնավիրուսից հետո «սև բորբոս» է հայտնաբերվել․ բժիշկները հեռացնելու են տղամարդու ձախ աչքը
Մեքսիկայում շաքարախտ ունեցող 34-ամյա Գրեգորիո Ավենդանյոյի մոտ կորոնավիրուսային վարակից հետո հայտնաբերվել է մուկորմիկոզ, որն այլ կերպ անվանվում է «սև բորբոս», հայտնում է «ՌԻԱ Նովոստի» լրատվական գործակալությունը՝ հղում տալով տեղական Milenio լրատվականին։
Տղամարդու եղբայրը լրատվականին ասել է․ «Քիթկոկորդականջաբանն ախտորոշել է մուկորմիկոզ․ նրան շտապ վիրահատություն է անհրաժեշտ»։
Հրապարակման համաձայն՝ Գրեգորիո Ավենդանյոյի մոտ մայիսի 10-ին հայտնաբերվել է կորոնավիրուսային վարակ և, հակառակ շաքարախտ ունենալուն, հիվանդությունն անցել է առանց խնդիրների, որից հետո տղամարդը վերադարձել է աշխատանքի։ Մայիսի 26-ին, սակայն, նա դադարել է ուտել, որից 3 օր անց դիմային նյարդի կաթվածով տեղափոխվել է հիվանդանոց։ Այժմ բժիշկները պատրաստվում են հեռացնել տղամարդու ձախ աչքը։ Բժիշկներն ակնարկել են ուղեղի հնարավոր վարակման և մահացության մասին։
Մուկորմիկոզը սնկային վարակի հետևանքով առաջացող հիվանդություն է, որն առաջանում է շրջակա միջավայրում առկա սնկային սպորների հետ շփման հետևանքով, կամ այն բանից հետո, երբ բորբոսը մաշկ է մտնում կտրվածքի, քերծվածքի կամ այրվածքի միջոցով։ Այն վտանգավոր է հատկապես շաքարախտ ունեցող մարդկանց համար։ Վերջերս Հնդկաստանում և Իրաքում գրանցվել են հիվանդությունից մահվան դեպքեր: