Ավստրալիայում կենդանի էակների գրեթե 70 տոկոսը դեռևս ուսումնասիրված չէ

Ավստրալիան երկրագնդի կենսաբազմազանության տեսանկյունից ամենահարուստ մայրցամաքներից է: Այստեղ է բնակվում կենդանիների բոլոր տեսակների մոտավորապես 10 տոկոսը: Այն ունի նոր տեսակների հայտնաբերման ամենաբարձր ցուցանիշներից մեկն աշխարհում: Ավստրալիայի հողերում, գետերում, ափերին եւ օվկիանոսներում, հավանական է, որ բնակվում են կենդանիների ավելի քան 700,000 տարբեր տեսակներ, հայտնել է Planet-today-ը:

Սկսած այն պահից, որ եվրոպացիներն առաջին անգամ սկսել են ուսումնասիրել, հավաքել եւ դասակարգել Ավստրալիայի անհավանական կենդանական եւ բուսական աշխարհը, գրեթե 200,000 տեսակներ գիտական անվանում են ստացել: Սա բավականին մեծ ցուցանիշ է: Մյուս կողմից, ավելի քան 300 տարվա ջանքերից հետո, գիտնականները փաստագրել են Ավստրալիայի կենդանիների տեսակների մեկ երրորդից պակասին: Մնացած 70 տոկոսը շարունակում է գիտությանը անհայտ մնալ: Ավստրալիայում տաքսոնոլոգները նկարագրում եւ գրանցում են տարեկան միջինը 1000 նոր տեսակ: Նման տեմպերով առնվազն 400 տարի կպահանջվի Ավստրալիայի կենսաբազմազանության նույնիսկ նախնական նկարագրությունն ավարտելու համար:

Նոր տեսակ գրանցելուց առաջ անհրաժեշտ է մանրակրկիտ ստուգում իրականացնել: Յուրաքանչյուր նմուշ պետք է համեմատել բոլոր արդեն հայտնի եւ անվանում ստացած տեսակների եւ դրանց մոտ ցեղակիցների հետ` համոզվելու համար, որ այն իսկապես նոր տեսակ է: Սովորաբար այս ամենը կապված է մանրակրկիտ լաբորատոր ուսումնասիրությունների եւ գեների հաջորդականացման հետ:

Նմուշներ հավաքելու եւ մոտ տեսակներն ուսումնասիրելու համար հաճախ շատ հետազոտություն է պահանջվում: Երբեմն անհրաժեշտ է ստուգել նմուշները աշխարհի թանգարաններում եւ հերբարիումներում, եւ միայն դրանից հետո են գիտական ​​հոդվածներում նկարագրվում նոր տեսակները, որպեսզի այլ գիտնականներ կարողանան գնահատել եւ վերլուծել դրանք:

Այս գործընթացը դանդաղ է ոչ միայն ինքնին, այլ նաեւ այն պատճառով, որ աշխարհում գիտելիքների համապատասխան մակարդակով գիտական ​​հետազոտողների պակաս կա: Խնդիր է նաեւ այն, որ նման առաջադրանքների կատարումն արագացնող տեխնոլոգիաները միայն վերջին տասնամյակում են հայտնվել: Եվ այս ամենը հանդես է գալիս ֆինանսավորման խնդիրների հետ միասին: Գիտնականներն ամբողջ աշխարհում մտահոգված են, որ նման տեմպերով Ավստրալիայի բուսական եւ կենդանական աշխարհի մեծ մասը կվերանա, մինչեւ մարդկությունը կհասցնի իմանալ դրանց մասին: