«Համբերության բաժակը լցված է». արդյո՞ք Գախարիան կվերադառնա Վրաստանի իշխանության Օլիմպոս. EurAsia Daily
Գիորգի Գախարիան չի թողնում այնպիսի մարդու տպավորություն, որն ունի այն խարիզման, որը կգրավեր Վրաստանի բնակչության զգալի հատվածին: Այս մասին EADaily-ին հայտնել է Վրաստանի նախագահի աշխատակազմի նախկին ղեկավար, հանրապետության խորհրդարանի մի քանի գումարումների նախկին պատգամավոր, Ռազմավարության և կառավարման ինստիտուտի ղեկավար Պետրե Մամրաձեն:
Վրաստանի նախկին վարչապետ Գիորգի Գախարիան Թբիլիսիում ներկայացրել է իր` «Հանուն Վրաստանի» կուսակցությունը:
Նա ղեկավարել է Վրաստանի կառավարությունը 2019 թվականի սեպտեմբերից, բայց ներքաղաքական ճգնաժամի և ընդդիմության հետ տարաձայնությունների ֆոնին ստիպված էր լքել վարչապետի պաշտոնը:
«Վրացական երազանք» կուսակցության հիմնադիր Բիձինա Իվանիշվիլիին հետևելով՝ 2021-ի փետրվարին Գախարիան թողել է իր պաշտոնը և լքել կուսակցությունը: Նա «Վրացական երազանքի» կառավարության 5-րդ վարչապետն էր և նրա կուսակցության ցուցակում 1-ին համարը 2020 թվականի հոկտեմբերին կայացած վերջին խորհրդարանական ընտրություններում: Այդ ժամանակ հիմնականում Գախարիայի բարձր վարկանիշի շնորհիվ կուսակցությունը հաղթեց ընտրություններում ՝ մնալով իշխանության ևս 4 տարի: Հիմնական ինտրիգն այժմ մնում է այն հարցը, թե արդյոք Գիորգի Գախարիան կառաջադրվի՞ Թբիլիսիի քաղաքապետի պաշտոնում՝ դրանով իսկ դառնալով գործող քաղաքապետ Կախա Կալաձեի գլխավոր մրցակիցը:
Հարցին այն մասին, թե ինչպիսին են Գախարիայի հաղթելու հնարավորությունները, Մամրաձեն պատասխանել է.
«Վրաստանը մնում է այն երկիրը, որտեղ ընտրություններին նախորդող վերջին երկու շաբաթներին իրավիճակը կարող է կտրուկ փոխվել մյուս ուղղությամբ: Դա տեղի է ունեցել բազմիցս: Գախարիան չի թողնում այնպիսի մարդու տպավորություն, որն ունի այն խարիզման, որն ընդունելի կլինի Վրաստանի բնակչության զգալի մասի համար: Նա չունի պոպուլիզմի, դեմագոգիայի, պերճախոսության այն մակարդակը, որով հայտնի են այլ առաջնորդներ: Նա ավելի շուտ տեխնոկրատ է. իր հայտարարություններում միշտ զուսպ է, իր սահմանումներում միշտ փորձում է ճշգրիտ լինել: Սա այն բանը չէ, որն ազդում է զանգվածների վրա: Մյուս կողմից, մարդիկ, որոնք լավ գիտեն Արևմտյան Վրաստանը՝ Սամեգրելոն, քաջատեղյակ են այն աջակցությունից, որը նա վայելում է այս տարածաշրջանում: Եվ սա քանակական առումով ընտրողների զգալի մասն է: Իմ կարծիքով՝ նա կկարողանա որոշ ձայներ վերցնել, բայց մյուսներին շրջանցելը բացառվում է»:
Լրագրողը հետաքրքրվել է, թե արդյոք Մամրաձեի կարծիքով Գախարիան Բիձինա Իվանիշվիլիի հերթական նախագիծն է, և Իվանիշվիլին ստիպված կլինի ստեղծել մեկ այլ քաղաքական թիմ`մաղելով նրանց, ովքեր իրենց չեն արդարացրել իշխանության ընթացքում:
«Ինձ համար դժվար է հավատալ դրան, բայց կասկածներ առաջանում են: Ո՞վ է ֆինանսավորում Գախարիայի կուսակցությունը: Բոլորս էլ քաջ գիտակցում ենք, որ այսօր առանց ֆինանսների պարզապես անհնար է որևէ հաջողության հասնել: Համաշխարհային պրակտիկան ցույց է տալիս, որ ոչ ոք չի համարձակվում ֆինանսավորել որևէ քաղաքական կուսակցության՝ առանց իշխող խմբի կամքի»,-պատասխանել է քաղաքական գործիչը:
Մամրաձեի կարծիքով՝ Գախարիան իր թեկնածությունը չի ներկայացնի գալիք ՏԻՄ, մասնավորապես` Թբիլիսիի քաղաքապետի ընտրություններին:
«Իմ կարծիքով ՝ ոչ: Կարծում եմ, որ տեղական ինքնակառավարման մարմինների առաջիկա ընտրությունները մի տեսակ փորձարկում կլինեն: Հիմնական ուժերը կուղղվեն 2024 թվականին (Վրաստանում խորհրդարանական ընտրությունները նշանակված են 2024 թվականին-Խմբ.)»,-նշել է Մամրաձեն:
Պատասխանելով հարցին, թե որն էր «Վրացական երազանքի» պառակտման պատճառը, որի հետևանքով Գախարիան ստիպված է եղել լքել կառավարության ղեկավարի պաշտոնը, քաղաքական գործիչն ասել է.
«Երկրում իրավիճակը բավականին բարդ է: Պատկերացրեք, որ վարչապետը սահմանափակ հնարավորություններ ունի: Հայտնի է, որ Գախարիան եկել էր մեծ ոգևորությամբ և փորձում էր երկիրը դուրս բերել բարդ իրավիճակից: Փորձում էր փոխել նախարարներին, բայց երկրում կային ուժեր, որոնք կարող էին կաթվածահար անել վարչապետի գործողությունները: «Գավրիլովյան գիշերվա» ընթացքում, մինչ վերջին րոպեն, նա չէր ցանկանում հրաման տալ ցուցարարների դեմ օգտագործել ռետինե փամփուշտներ և հատուկ սարքավորումներ: Այո, նախատեսում էին ցրել ընդդիմադիրներին, բայց առանց կոտորածի: Իսկ հետո պարզվեց, որ ամեն ինչում մեղադրում են նրան, և նա, պարզվում է, քավության նոխազն է: Հիմա պարզվում է, որ Նիկա Մելիան (Միացյալ ազգային շարժման նախագահը) կկալանավորվի, որին կհաջորդի իրավիճակի ապակայունացում Վրաստանում, և նա կրկին պատասխանատու կլինի իր կողմից չկայացված որոշման համար: Ըստ այդմ, համբերության բաժակը լցվել էր»:
Լրագրողը նշել է, որ իշխող կուսակցության նախագահ Իրակլի Կոբախիձեն ԶԼՄ-ներին ասել էր, որ Գիորգի Գախարիան գործել է նախկին նախագահ Միխեիլ Սաակաշվիլիի շահերից ելնելով`հրաժարական տալով նախքան Մելիայի ձերբակալությունը, և հարցրել է՝ արդյոք սա, Մամրաձեի կարծիքով, համապատասխանում է իրականությանը:
«Ոչ, դա չի համապատասխանում իրականությանը: Մելիայի ձերբակալությունից առաջ «Միացյալ ազգային շարժման» զարկերակը անգամ չէր զգացվում: Իհարկե, Մելիան առաջնորդի որակներ չունի, այդ իսկ պատճառով նա այդքան համառորեն նստել էր բանտում: Դա միակ միջոցն էր, որով նա կարող էր գրավել մամուլի, եվրոպացի պաշտոնյաների և այլնի ուշադրությունը: Բայց Գախարիային մեղադրել Սաակաշվիլիի հետ ինչ-որ համաձայնության համար, անհեթեթություն է»,-եզրափակել է քաղաքական գործիչը: