Հակամարտության ռիսկերը մինչեւ 2030 թվականը կավելանան. Ֆրանսիայի զինված ուժերի գլխավոր շտաբի պետ

Ֆրանսիայի զինված ուժերի գլխավոր շտաբի պետ, գեներալ Ֆրանսուա Լեկուանտրը վստահ է, որ հակամարտությունների ռիսկերը մինչեւ 2030 թվականը կավելանան, իսկ կարծիքներն այն մասին, որ Սառը պատերազմից հետո այլեւս խոշոր բախումներ չեն լինի, միամտություն է, գրում է ՏԱՍՍ-ը:

Նրա խոսքով` աշխարհը դեպի աշխարհակարգի վերակազմավորում է ընթանում, որը կառուցվելու է Միացյալ Նահանգների ու Չինաստանի մրցակցության շուրջ: Այս վերակազմակերպման ընթացքում աշխարհի բոլոր երկրները ստիպված կլինեն ընտրել իրենց կողմը, ասել է նա: «Չնայած մենք կասկածի տակ չենք դնում ԱՄՆ-ի հետ մեր հարաբերությունները, բայց չպետք է ներքաշվել այն անիմաստ առճակատման մեջ, որը կարող է առաջանալ Չինաստանի եւ ԱՄՆ-ի միջեւ»,- ասել է Լեկուանտրը: Նրա խոսքով` Ֆրանսիան եւ եվրոպական մյուս երկրները պետք է հավասարակշռված դիրքորոշում գտնեն` հույսը դնելով ռազմավարական գործընկերների վրա:

Գեներալի խոսքով` ներկայումս Ռուսաստանը եւ Չինաստանը Ֆրանսիայի համար վտանգավոր մրցակիցներ են ստորջրյա եւ տիեզերական ոլորտներում: «Մենք պետք է բանակցային ուղիներ գտնենք,- ասել է նա:- Բայց այսօր մենք գտնվում ենք նման կարգավորումից հրաժարվելու փուլում: Այդ դիմակայությունը վտանգավոր է»: Նա վստահ է, որ Մոսկվան փորձում է թուլացնել ժողովրդավարական մոդելը` գործելով թվային տեխնոլոգիաների ոլորտում, եւ այդ սպառնալիքն ազդում է ինչպես ազգային տարածքի, այնպես էլ այն տարածաշրջանների վրա, որտեղ Ֆրանսիան ունի իր շահերը: «Այսօր Ռուսաստանի, Թուրքիայի կամ Չինաստանի ներկայությունն Աֆրիկայում տագնապ է առաջացնում»,- ասել է նա:

Լեկուանտրը նաեւ կարծիք է հայտնել, որ հակամարտության ռիսկը մինչեւ 2030 թվականը կավելանա:

«Լարվածությունն ավելի լուրջ կլինի»,- ասել է գեներալը: «Սառը պատերազմի ավարտին ոմանք միամտորեն հավատում էին, որ այլեւս ոչ մի խոշոր բախում չի լինի»: Այնուամենայնիվ, ըստ զինվորականի, նույնիսկ այդ ժամանակ նորոշ զարգացող երկրներում և հատկապես արաբական աշխարհի պետություններում երքին դժգոհության նշաններ կային: Նրա խոսքով՝ դժգոհություն է արտահայտվել նաեւ արեւմտյան աշխարհի դեմ, որն որպես հեգեմոն էր ընկալվում:

«Այս ամենի հետեւանքները մենք տեսանք 2000-ականների սկզբին, իսկ հետո եղան ահաբեկչությունները Ֆրանսիայում,- շարունակեց նա: -Մենք դա դեռ երկար կզգանք: Ահաբեկչության սպառնալիքը շատ շոշափելի է հասարակության համար»: Բացի այդ, ըստ Լեկուանտրի, կան տարածաշրջանային ուժեր, որոնք կողմ են ծայրահեղ ազգայնականությանը: «Դրան գումարվել են ժողովրդագրության, կլիմայի փոփոխության կամ ժողովրդավարական վարչակարգերի դժվարությունների հետ կապված խնդիրներն Աֆրիկայում»,- հավելել է նա: Նրա կարծիքով` հիմքեր չկան կարծելու, որ տասից քսան տարի անց այդ անկայունությունը կավարտվի: